La gnot dai cadutiscj canibai

Abbondanzio, plen come une gubane, al stave lant fûr dal solit bar. Il sens di pissâ discjadenât dai mil tais de serade però lu blocà un moment di masse dongje de puarte, cussì che Meni, il mat plui sledrosât dal paîs, lu intercetà.
“A son za chi!” al dîs il sfulminât.
“Ma ce âstu? Molimi!” al rispuint sustât Abbondanzio, gratantsi la gruesse panze.
“I cadutiscj!” al berle Meni.
“I cui?”
“I cadutisti! Cussì a vegnin clamâts dai forescj!”
“Sì, biel. Propite une biele monade.” al cîr di lâ fûr, ma Meni nol veve finît.
“Lôr a rosein dute la robe che al cole par tiere. Ma propite dut: pomis, cjichis e CRISTIANS!”
“Cristians? Parcè le àn cui cristians e no, fâs cont, cui indûs?”
“Ma no, mestri! Cristians tal sens di PERSONIS! Se tu colis ti mangjin vîf!”
“Ma va su l’ostie, tu e lis tôs fufignis!”
Lu sburtà vie e al le fûr dal bar, secjât. Lis stradis a someavin plui nereosis e tetris dal solit. Un tic di malcuiet i fasè vignì un sgrisul sù pal comedon, ma al le viers cjase come se nol fôs sucedût nuie. Un sunôr sec, però, lu fasè blocâ dongje l’ultin ferâl ancjemò in vore li di borc Cjalcjut. La lûs si studâ!
Un par di voi slusints lu calumavin dal profont des maglis de gnot profonde e triste. Un moment daspò, e un altri pâr al si zontà, compagnât subite di un altri pâr ancjemò. E vie indenant, fin a vê denant almancul sedis voi. Lis musis anonimis si svicinin a Abbondanzio, fin sote la lûs flape: gjavât che a jerin vistûts dome cuntune tonie e che a vevin ducj dai voi di fiere, e jere dute int ordenarie: vieris, fruts, zovins, oms, feminis…
“Cole! Cole!” a murmuin, sot vôs ma agjitâts, cui braçs bandonâts par lunc.
Abbondanzio al vuiche come une bestie e al scjampe di corse. Ma il vin, lu savìn, al pues da cualchi probleme motori, e nol rivave plui a stâ in pîts. Al pendole un pôc e al va jù come un salam. Subite un berli lu glace, “Al è colât!”, e i cadutiscj si butin sul grues cuarp, cui dincj in mostre, ansiôs di muardi la cjar vive di Abbondanzio, che al berle pe l’ultime volte.

di Alessio Ecoretti
#1478

1 comment