Il patriarcje

Cemût vevial fat a resisti? Al jere un vêr meracul.
Il stât plui siôr dal mont, plen di bancjis. Rivât a resisti cence fâsi invadi dal Imperi maritim di Vignesie e di chel de Austrie. Il Patriarcjât di Aquilee, stât prospar, cu la sô monede, il so esercit, piçul ma eficient. La flote ancorade tai puarts di Grau e Lignan. La aviazion cui gnûfs cjacebombardîrs e i elicotars di combatiment. Il servizi segret tra i miôrs dal mont, la int plui siore, bielis cjasis e vilis e citâts plenis di vert, a scomençâ de capitâl aministrative: Passarian di Codroip.
A disevin che Vignesie e la Austrie a podevin mangjâsi il Patriarcjât intun sôl bocon e che lu mantignivin dome come “stât cussignel”. O varès voie propit di viodi. I furlans a varessin vendude cjare la piel!
Velu li il gnûf Patriarcje Otobon XV, a pene investît de cjarie. Al à cuarante agns e al sfile su la “Patriarcje-mobile” saludant il popul sul sagrât de catedrâl di Aquilee.
Al è alt plui di un metri e otante, cun cjavei neris riçots, piel un fregul ulivastre e voi verts a mandule.
Al fâs simpri sport e al è campion di arts marziâls e Tetrathlon.
Un lunc gabanot di piel nere cui alamârs e je la sô vieste. Ator  de vite al à une fasse zale e blu. Devant al à i donzei e ai flancs de automobil la sô vuardie privade personâl cun alabardis e laser.
Lis bandieris cu la acuile medievâl bertrandine a sfodrin dute la place e un standart grandonon al è stât esponût sul tor de catedrâl.
Ma dut il mont al à invidie di lui e de sô nazion floride. Une man sassine e je pronte tra la sdrume di int: un agjent forest o plui probabilmentri un traditôr cuntun revolvar al trai doi colps.
A bastin.
Il patriarcje al cole a tiere colpît al pet. Al è dut sanganât. La int e berle di orôr.
I miedis a rivin dongje; al è ferît in maniere grave: nol sorevivarà.
Intant la man sassine e je scomparide tra la sdrume. Il traditôr o agjente forest (mai si cognossarà la veretât) al fâs pierdi lis sôs olmis e di sigûr al comuniche daurman l’esit de sô mission a cui che i à dât l’ordin.
Al è il segnâl.
I esercits aleâts di Austrie e Vignesie a passin i confins e si spartissin il piçul stât che cussì al finìs la sô storie milenarie intal 2077.

(CRONACHIS DAL FRÎUL, di Ares di Montalban)

di Checo Tam
#1***

3 comments