La scomesse

Gjelmo al jere un balonîr, al gjoldeve contant storiis dubiosis, dulà che par altri al veve simpri la miôr part. Se al beveve un got di plui la sô fantasie no veve limits.

Une dì al contà che dai delincuents lu menaçarin cuntune pistole, cence dubitâ si butà sore di lôr disarmantju e daspò ju sturnì. E al diseve: – Ricuardaitsi che Gjelmo nol à pôre di nuie e di nissun.

I amîs a fasevin fente di crodi e i jemplavin la tace ridint des sôs baronadis. Viodintlu che al jere bielzà madûr, un di lôr lu stiçà: – O scomet che no tu varessis il coraç di stâ bessôl par une zornade interie intun cimitieri. – Ducj a riderin di gust e  Gjelmo al fevelà:
– O starai tal cimitieri di bessôl… ma di gnot!!!
– Alore doman tu le passarâs li fintremai che il vuardian al rivarà a buinore a vierzi il puarton.- i diserin.

Tal doman sul imbrunî si cjatarin sul puest, la lune ogni tant e sclarive la gnot. Gjelmo al scjavalgjà il mûr e si saludarin. Doman a buinore a saressin stâts li par controlâ!!!

Restât bessôl, Gjelmo si organizà, si jere puartât un fiasc di vin e dai spagnolets, al impià un e si plaçà dacîs di une colombere, ogni tant al mandave ju un cluc dal fiasc. Chê gnot al faseve tant frêt, Gjelmo al jere pintût di no jessisi cuviert avonde.

– Che al scusi siôr. – A Gjelmo i vignirin i sgrisui a sintî che vôs daûr di lui. Al jere un zovin di biel aspiet.
– Cui sêstu? Tu mi âs spaventât.
–  O soi un acompagnadôr di animis – al rispuindè.
– Ce robe? Ma sêstu mat? Va vie.
– O soi ca par judâti. – i disè il zovin ridint.
– Calme amì, no sta dî stupidadis, jo o soi vîf e san.

Ma il zovin al continuà: – Se tu cjalis adalt tu viodarâs miârs di cjandelutis, lungjis, curtis, impiadis, distudadis, ognidune a rapresente la vite di un uman. –

– Incredibil – al disè Gelmo. – ma… ise ancje la mê? o volarês viodile, jo no ai mighe pôre.
– Sêstu sigûr?  Di solit i oms no vuelin savê. Vêle là che  je!
– i disè il zovin. Il pavêr dal mocul si steve distudant: – Noooo!!
Lu cjatarin scrufuiât dongje de colombere. Tes mans fredis un fiasc di vin vueit.
di Galliano di Buenos Aires
#1***

1 comment