CorseCurteNovembar#19 – No simpri di bot e scolp

#19 – No simpri di bot e sclop

Al rive, ogni dî, ma no simpri di bot e sclop, il cricâ dal dì.
Dipent dal umôr dal timp: pegri o svelt, al rive, simpri.
Se la zornade si presente biele, il soreli al fâs tant ben il so lavôr.
Verementri, si fâs preâ, al sta in spiete daûr dai nui, dopo vê scovât vie la gnot e la lune e dutis lis stelis.
Il soreli non lasse nuje indaûr par insiorâ chel spetacul.
Par prime robe, al bute sù, sore il cîl, i cjars plens di aur e di porpore, al sofle intai siei scartòs di tion e al messede dut intun polvaron colorât.
Daspò al sparnice, svelt svelt, il viole, il lile, il celestin, il narançon, il vert, il maron, e zumielis di barlums, simpri atent a stâ taponât.
Cul pît sore la puarte dal cîl, pront a vierzile, al met insiemi l’efiet plui sflandorôs: al fas cjapâ fûc a la girandule che e segne la fin de gnot, al fâs scjampâ lis fiondis luminosis e, intal moment dal sclopâ, al zire – sburît –  par fâlu ancjemò plui meraveôs.
Lui, il siôr soreli, lui, l’eroic protagonist, al da flât a lis trombis d’arint e, cun la sô spade magjiche, al slambre la sede dal cîl dal mont e, jenfri lamps e zûc di lusôrs, si fas viodi.  Finalmentri!
Al è un pecjât che un spetacul cussì biel al sucedi di matine, masse di buinore. Pôcs lu viodin e lu gjoldin.  Se al capitàs di dopo misdì o, miôr, di sere, a saressin in plui a viodilu.
Ah, just, no si pô, parcè che il soreli al à di la a mont.  E, daspò, nassi in chê altre part di mont.

di ***
#1***

1 comment