CorseCurteNovembar#15 – Ce stufe!

#15 – Ce stufe!

La mê e je propit une brute vite!
Vivi di gnot, tal scûr, cul frêt che ti jentre tai vues. L’umit che ti scosole i muscui.
Simpri tabarossât ta chest pastran penç, pelôs, imbastît cuntune lane dure e ruspiose che no mi dâ pâs. E puce, par fin, cheste maladete di istriane che o scuen tignî strente intor di me. Parsore lis spalis la gjachetate e à un cuel alt che mi dâ un fastidi mostro! Mi dâ torment e mi pice inte cadope. Mi ven dificil ancje russâmi!
No sai indulà stâ. Denant di un barcon, o viôt lampâ lontan. Il sgriament dal cîl nereôs e torgul e il bruntulament dal rogan a deventin il sot font di cheste gnot che e somee no finî plui.
O soi malcuiet. O voi sù e jù pes scjalis. De cjamare al puiûl e po contrari. O rivi fin dongje il cuviert. Une barconete cuntune gridele rusine si podarès vierzi cun pocje sgrimie. Plui di une volte mi è passât pal cjâf di butâmi jù di un plomp, ma no valarès a nuie.
Gnotui maledets!
Ancje i mûrs mi dan cuintri. Odôr di mufe e di lisp. Aghe sporcje e sgote fin sui scjalins di marmul consumât. Di ben che no poi i pîts, se no ju varès strafonts.
Ma cui vignaressial a metimi a puest chest me cjason? Lavorâ di gnot? Cui? Nissun! Ma al è pôc ce fâ! Vie pe zornade no esist, nancje pe muart! Chi mi cjatin dome tal scûr!
Po ben, vonde! Cumò o soi par fin strac di lamentâmi. O torni te cjamare. O ai un gnervôs che mi fâs lâ il sanc in aghe. Ma guai! Nancje pensâ une robe dal gjenar! Mico o ai voie di invelegnâmi!
Mi distiri tal jet, dûr e strent. Ah, si! No pues nancje gjavâ la dentiere!
Ce stufe!
O sieri il tapon. Tant nissun mi disturbarà. Cui varessial il coragjo di rompi i tabars al plui grant dai vampîrs?
E cumò o cîr di durmî. Prin che la gnot si sfanti. Prin che al rivi il criche dì.

di ***
#1***

2 comments