CorseCurteDicembar#10 – Nadâl picinin

#10 – Nadâl picinin

Al rivave l’Ucielut inta chê gnot. La gnot di Nadâl dal gno jessi frutine.
E la nêf e ploveve cun flocs di glace, lizerins e imacolâts, invuluçâts intun cidinôr di flabe e di pôre.
Bessole, inta chel jet plen di cuviertis e l’odôr acit dal sisin intal urinâl, mi fasevi une idee di cemût che al podeve jessi chel Ucielût.
Jerial piçul o pûr bocon, blanc come un colomp o neri come un mierli?
O ai, simpri, vût pôre dai uciei, jo!
E mi pareve che mi varés sveade sbatint lis alis sore la muse.
Il côr al jere un glimuç di fier.
Mi domandavi se al ves frêt, cundute la nêf che e continuave a colâ.
Ce mi varessie puartât?
Bagjigjis e coculis e, forsit, cualchi biscotut di meti in muel intal lat, a comedâ lis crituris dal stomi.
La fan e jere simpri, in ogni moment.
Tignivi i voi vierts e o cjalavi il cjalçut di lane grise, pojât sul barcon.
Po, come intune magjie e rivave la matine.
La glace sul barcon e jere ancjemò plui gruesse, e veve becs fins e dissens di telis di rai d’arint.
Vierts i voi, eco, culî, il cjalçut, sglonf.
Il côr, in gjonde, al bateve par dut e lis mans a jerin za sore il cjalçut.
Braçolât, come un pipin, lu strenzevi intor di me, come a scjaldâlu o pûr par tignî lontane la delusion.
Di sigûr no podevin jessi lis pignatutis che o insumiavi e che o spietavi da l’an passât.
Cjalavi e… sì, i biscots a jerin. Vignivin di Milan.
L’Ucielut al jere lât a Milan par me.
Mi sameave, pardabon, un biel regâl!
O jeri contente, ancje dai bagijgjis e da lis coculis.
Lavi in cusine, svualant par lis scjalis.
“Al è rivât l’Ucielût, mame, papâ”…
Lôr a ridevin cui voi. O eri siore: o vevi dut.
Ancje la nêf, alte, blancje e fofe come bombâs, e jere me.
Il fûc piât mi scjaldave lis orelis. No mi fasevin plui mâl. Savevi parcé: al jere Nadâl.
E, gno pari, al poiave Gjesù Bambin jenfri de Madone e di San Josef.
Al diseve une prejere cidine e mi cjarinave la muse.
Amôr, il so.
Armonie, la mê.
Intant, fûr, nol finive di neveâ.

di ***
#1***

4 comments