CorseCurteDicembar#09 – Zûcs d’Invier

#09 – Zucs d’Invier

La gnot de Vilie di Nadâl la nêf e veve scomençât a flocâ cidine cidine come volint zuiâ di scuindon e intratant e leve cuvierzint la place cuntune blancje coltre, si steve creant une magjiche atmosfere nadaline.

Tobie e i siei fradis a durmivin ducj intun grant jet, doi da cjâf e doi da pît, nol jere par mancjance di cjamaris, in chest mût a pativin mancul la criùre, dome che ogni tant i pîts dai fruts si alternavin tocjantsi la spale o la muse di chel altri.

A penis che a nasarin la presince de nêf, i cuatri si jevarin sù di corse, barufantsi par podê cjalâ a traviers di chel tocut di veri dal barcon, che ancjemò no si jere glaçât dal dut e che ur lassave viodi la place neveade. Il rest des lastris a parevin mosaics di intarsis ramâts, che cun la rivade dal soreli si saressin disfats. L’entusiasim ju inviulave a tal pont che no sintivin il frêt, ancje se tremavin dal cjâf ai pîts.

Il bacan dai fruts al veve il so motîf: e scomençave la stagjon dai zucs invernâi. Ognidun al disè la sô su ce che a varessin fat:

– Jo o larai cu la slite tai cuei disore!
– Jo o fasarai un pipinot di nêf tal curtîl!
– Jo o larai a balonâ la int in place!
– E jo o larai a sgliciâ! – al vosâ Il plui piçul saltant di ligrie. Al jere simpri dacuardi a cualsisei cagnere propueste.

Come altris agns, al pipinot i varès cuviert il cjâf cuntun cjapelat di paie, une carote come nâs e dôs ciespis come voi e in bocje la tant preseade pipe a cuarnet dal nono. Il vieli si inrabiave e al coreve daûr dal frut, che al scjampave batint i talons, lant a platâsi tal ronc: nol à mai podût o volût cjapâlu. Une volte recuperade la sô preziose pipe, al tornave a sei il nono plui bon dal mont.

In chel batibui e jentrà la lôr mari, che za e pensave a chei zenoi macolats che e varès dovût onzi e fassâ.
– Cidins, cidins, che e je ancjemò gnot.
E sierant la puarte e distudà la lus.

di ***
#1***