CorseCurteDicembar#05 – Cidinôr blanc

#05 – Cidinôr blanc

Le veve sveade il cidinôr. Une robe che no veve mai sintût, alc di stramp. Si jere jevade par bevi un pocje di aghe, cun la bocje secje dal cjalt dal aiar. Intant che e jere daûr a bevi, e cjalà fûr cui voi ancjemò indurmidîts. I tets des cjasis, i prins arbui e plui inlà lis monts, neris e grandononis parsore dal paisut che al polsave cuiet. Masse cuiet, e pensà di bot.
Cul nâs cuasi che al tocjave il veri e tornà a cjalâ miôr. Un veri frêt che si bateve cuintri il clipit didentri. Chest cjalt le veve lassade maraveade cuant che e jere rivade ta chê cjase. Par jê, il clip al ven dal soreli, fuart e rabiôs de sô tiere. Chest al è un misteri, nol ven di nissune bande. Il soreli nol si viôt e al va a mont masse adore.
Cumò e veve capît parcè il cidinôr al distudave dut. Une robe blancjute e vignive jù plan planchin. Une coltre blancje e cuvierzeve bielzà i tets e lis pontis dai arbui. I rumôrs no jerin plui. E tornà a durmî cence capî nuie.
A buinore le vevin cjatade te puarte, cjalant difûr malfidade. Sot di une lûs gris, dut al jere blanc, ancje lis monts a vevin une cjane tes crepis. I vevin vierzût la puarte par lassâle lâ fûr, cuntune bocje di ridi che jê no rivave a viodi.
E fasè un pas fûr, e si jere voltade par controlâ che la puarte e fos ancjemò vierte. No si fidave di cheste int, no ju capive cuant che i fevelavin. E jere rivade tal ôr, dulà che e scomençave chê robe blancje. Si jere voltade une altre volte, viers il cjalt e la lûs de cjase.
Malcuiete, e provà a cjaminâ parsore la coltre blancje. Un, doi, trê, cuatri pas. Frêt, sigûr, chest lu veve capît subit. Ma la robe che i veve savoltade e jere che chest cjossul odeôs i rivave za ae panze.
Cuntun sol moviment, si jere zirade par cori te puarte, biel alçant la code, cui pêi de schene drets. Cence dâ nancje un cuc ai parons de cjase e tornà al so puest, sot la poltrone de none. Nissun nol è stât bon di fâle tornâ fûr finche la Vierte e jere rivade in paîs.

di ***
#1***