CorseCurteOtubar#19 – I’ll be watching you

#19 – I’ll be watching you

I ferâi a travanin i cisats de fumate. Francescje e strenç il volant sorepinsîr, un rideç i sbelete la muse biel che e pense ae serade cu lis amiis. Rivade cjase, e cîr lis clâfs te borsete, ma la man si bloche cuant che e viôt la rose sul tapêt fûr de puarte. Un garoful ros. Cence biliet.
Cescje e reste in vuaite, le bute a coleghis e amîs, ma nissun al rive a instradâle.
No i da impuartance fin ae domenie che i sunin ae puarte. E je sot de doce. Si intabare cul suieman e e va a vierzi … ma nol è nissun. Sul tapêt, un altri garoful ros. Cheste volte al è un biliet. “Slisse come la tô piel”. Cescje e scuen grampâsi sul antîl. Al saveve che e jere in bagn. Le à viodude crote.
I carabinîrs no puedin fâ nie. “Al sarà cualchi spasimant che nol olse a declarâsi”, i disin cence abadâ ai sangloçs e ai scjas di gnervôs che le fasin saltâ su la cjadree.
Cescje si cjale ator di continui, no va plui fûr, e lasse impiadis dutis lis lûs… Ma il scûr al rive simpri, e i vencui a son pronts a grampâle.
Une gnot, il sglinghinâ dal telefonut le fâs vuacâ. Sconosciuto. “Pronto”. Di là, un respîr che al va sù di intensitât e al tufe fûr un “Tu sês mê!”. Cescje no rive a tignîsi, la corse in bagn che si siere cun jê scrufuiade denant dal water.
No sa cui clamâ. Lis amiis a àn famee, sô sûr e je lontane. I ven iniments Nicola. Si cjatin pal gustâ insiemi a altris coleghis e a van ancje fûr cul stes zîr. Si è pene lassât cu la morose.
Doi dîs dopo che la audi di lui e je parcade in zardin, su la cinccent di Cescje e comparìs une scrite. Troia.
“No stâ preocupâti. Cumò al sa che no tu sês bessole” i dîs Nicola strenzintle intun bracecuel.
Al è biel ve cui che le console, che le fâs ridi… Cence inacuarzisi, si è pierdude daûr di lui.
Cussì, cuant che a finissin sul divan, si sint sclopâ di gjonde. Al è alc ta chel respîr seneôs, ma no rive a intivâlu.
Oris dopo, te fumate dal sium, la vôs di un vencul e rive lontane.
“Slisse come un garoful. No stâ vê pôre, cumò tu sês mê”.

di Fuguline
#1409

1 comment