CorseCurteNovembar#10 – Spietant il lusôr

#10 – Spietant il lusôr

Al mancje pôc al cricâ dal dì ma, in tal cjistiel di Strassolt, a si è dibatût fin a pôc prime e, a la fin, ducj si son sdrumâts par il sun e pe strache. Istès, suntune tor dal mûr orientâl, al è ancjemò un dai ospits che a nol rive a lâ a durmî. E passe une sentinele: “Dut ben Missâr?”
“Sì, dut ben, graciis. Vise il comandant che mi fermi achì ancjemò un moment.”
“Subit!”
La sentinele a va vie cun la fale e su la tor al torne scûr. L’om al somee cjapât dai siei pinsîrs cuant che al sint rivâ une gnove presince: “Ce robis, il proveditôr gjenerâl Marcantoni Barbar che a nol duar nancje di gnot!”
A son dôs zovinis: la fie dal Cont e une sô servidore. “A son timps dûrs madamis e un soldât a nol à mai di fâsi sorprendi.”
“A disi il vêr a mi è parût sorprendût un moment prime.” i fâs ridint.
Il nobil venezian al stâ al zûc: “Un soldât al à simpri di fâsi sorprendi da lis bielis damis.”
A ridin, dopo lis zovinis i passin une cuvierte: “O vi vin viodût ca di fûr, al tache a fê frêt di gnot.”
“Graciis par il pinsîr.”
“Us vin sintût discuti fin che a jerin aromai lis trê da la matine. Cemût che e je lade a finîle?”
“A è lade ben, l’at al è stât firmât.”
“E alore parcè che nol va a durmî.”
“O vuei spietâ il cricâ dal dì, il prin da la gnove citât.”
“Spiegaitnus Missâr, la mê servidore e je un pôc preocupade, e conte che la int a si insumie di gnot di une citât fate come la tele dal rai.”
Il nobil al rît: “O viodarês che la gnove citât a sarà cetant biele.”
La fie dal cont i torne la ridade, alore a tache la sô servidore: “La citât e varà trê puartis: il numar dal superament, une opare gnove. E varà sîs cuartîrs: il numar de bielece. Nûf baluarts plui trê puartis a son dodis elements, moltiplicâts par i sîs cuartîrs al è setantedoi, il numar di Diu.”
“Ce che a son chestis robis?” Al fâs il nobil, maraveât.
“Numars inte Bibie dai ebreus, Missâr.”
E, in chel moment, la prime lûs dal soreli e tache a iluminâ lis bielis ridadis des dôs zovinis.

di ***
#1***

2 comments