CorseCurteNovembar#09 – La sole e uniche

#09 – La sole e uniche

“La Uniche” no duar. Usgnot e zire tal jet e e fâs bataie ae ultin morôs fedêl che i reste: la insonie. La brame dal biel timp passât e je lade vie e cumò il suplent al è l’elisîr.
Al è bon l’elisîr: cuant che lu bêf e e devente plui fuarte, sglonfe, zovine, ancje se di chê no ‘nt veve nuie, za che jê e jere une gjate viele che lis à vivudis dutis e i dams dal timp e la malevite a si viodin cun clarece te sô muse, e soredut tal so spirt. E à vivût de tristeriis fin cumò. Sì, la tristerie e je stade un bon nudriment pal so cuarp e, daûr di cualchidun, la tristerie e je miôr che l’amôr… politics soredut… e “La Uniche” e je la ultime di lôr. La politiche che e à sepulît ducj i altris.
Però, la tristerie di bessole no fasarà il lavôr: e à dibisugne di une robe plui potente: l’elisîr. Al è stât gjavât fûr cun sgrimie par un dai siei sclâfs superiôrs, un dai pôcs svelts che a son restâts daspò la Grant Pulizie par puartâ “La Uniche” a sedi plui uniche che mai.
La idee le à cjapade cuant che, in preson, il chimic al doveve scoltâ i discors che ogni dì si pandevin par TV: i luncs, cence fin, discors che a jerin avonde efetîfs par netâ i çurviei dai sclâfs sorevivûts. E incressi l’odi dai contraris.
Il chimic al à rilevât che prin di scomençâ a fevelâ, la sô muse e jere cence vite, avilide, lancurose, ma impen dulinvie i discors, si mudave intune altre, sflandorose, lusinte, brilant, il perfet contrari des sôs peraulis: plenis di asse, virulence, tristis, velenosis ancje.  E cussì lui al à scuvierzût che l’odi al pues jessi un tonic par ciertis personis. E “La Uniche” e jere une di chês. E tant che Jean-Baptiste Grenouille che al à volût distilâ la essence dal amôr, lui al à pensât di distilâ la asse, par dâle di bevi.
Jê e à cjatade la idee straordenarie e, cence spietâ, a àn scominçât a distilâ odi bulint dai siei presonîrs intun lambic zigant.
Lu beveve al cricâ dì. E dut al jere plen… fin che i presonîrs a àn scomenciât a svaporâ, e mi si perdoni il zûc di peraulis…
Di dulà podarìno gjavâ plui asse? … Sul cricâ de albe, che nol è pôc, e à cjatade la soluzion: O varìn di fâ boli i miei coreligjonari intant che a scoltin i discors dai miei contraris!

di ***
di 1***