CorseCurteNovembar#07 – Civuite

#07 – Civuite

“Al cjante il gjal, al criche il dì…”; biele la vilote che o sintivi di piçul, ma jo no mi davi pâs par chel puar zovin che al scugnive partî cussì adore.
Jo o starès a durmî fin a ore di gustâ se femine e fie no mi rompessin i bebeis une dì sì e chê altre ancje cu lis lôr fufignis:  Pai, jeve e ven a menâmi a scuele che o ài pierdude la coriere”, “Om, sveiti e ven a judâmi che no pues fâ dut bessole”. Il folc lis trai.
Po, une volte in pîts, se pues, mi rondoli de poltrone al sofà e a àn di rivâ lis cinc dopomisdì par che o comenci a carburâ e lis nûf dopo cene par che o jentri tal plen dal morbin.
Chest al è simpri stât il gno bioritmi; mê mari mi diseve che di a pene nassût le vevi lambicade parcè che no le lassavi durmî: o vevi cjapât la gnot pal dì.
Jê, mi clamave “civuite”, ma a mi no mi comodave tant chel sorenon, prin parcè che no mi pareve un non masculin, e po parcè che la civuite e je un uciel noturni di mâl auguri: e somee che la sô glatide e puarti il muart te cjase là che si ferme.
Cun di plui e da la cjace ai pantianins, besteutis che a mi non mi son mai plasudis, anzit, di frut mi metevin une pôre mostre cuant che lis sintivi talpinâ sul cjast e mi vignivin i sudôrs frets al pinsîr che tal scûr a vignissin jù a roseâmi i poleârs.
Ma oltri a tignîi il music par zornadis interiis a chê benedete femine, ce podevio fâ? In cjase e comandave jê.
No mi dave recuie nancje la domenie: par fâmi lâ a Messe piçule, chê des vot di matine tant par intindisi, mi spalancave il barcon de cjamare e mi tirave vie lis cuviertis vosant: “Sù mo, sù mo che a cheste ore al è jevât ancje il Pape”.
Ce mi interessavie a mi di ce che al faseve il Pape? Propit nuie, ma je di chê orele no sintive. Cul risultât che cuant che o ài podût decidi par me, no soi lât plui nancje a Messe grande, chê des undis.
In compens, gracie al gno particolâr fatôr biologjic, no ài mai vût problemis cul lavôr, il miôr mistîr dal mont: o fâs il pancôr e cuant che al criche il dì… jo o voi a durmî.

di Maghe Olstrele (Rosute Pelote)
#1418

1 comment