Cryptofriûl a Muçane… la croniche!

Vinars stât la nestre clape e jere in chel di Muçane par un dai siei Viaçs tal Cryptofriûl e o vin un bon motîf par scrivi chest articul di croniche de serade. E voleso savê cuâl? Che Stiefin Panarie – aromai lu clamìn cussì – content de serade di Viscon, no dome al à vût gust di tornâ a viodi il spetacul, ma nus à fat parfin il regâl di fânus des bielis fotos di professionist e alore ce di miôr che un articul sul sîf par mostrâusalis ancje a voaltris!

La prime le viodês bielzà chi parsore, cul nestri Raphael Seraphin in modalitât presentadôr di gale dut scjavelât che al vise i presincj che a son dentri di une trasmission televisive, lis telecjamaris a son ma no si viodin e insome… a àn di perdonâ se a saràn dai moments di interuzion par vie di chel, da rest il viaç al è lunc, stant che la storie di chê sere e je di bande Sauris e rivâ di Muzane a Sauris, metint une peraule daûr chê altre, i vûl timp e cefâ. E il prin cefâ lu à vût Francois Tami, l’innomenât atôr francês che al sa benon il furlan e che o viodês chi a lei, ancje se a dì il vêr nol cjatave nancje ce che al veve di lei… Ma si sa, chescj atôrs, a son ducj particolârs.

Insome… dut cuasi ben, ma si sa che Raphael al è un professionist (cjalailu ca in bande, ce pacjific, intant che al meteve dongje i tocs di ce che nol funzionave) e ancje se tal so copion a jerin sparidis miezis peraulis par vie di un toner sassin, la robe e je partide subite a menete e il public al à intivât daurman che si fevelave di… Maravee! Maravee triste, par vie di une vuere, une vuere che e je capitade in Friûl intai agns 1978-1979, su lis monts parsore Sauris, in particolâr su la Bivare. No saveviso nuie? Ma cumò ben a lu san i presincj, che intal sintî la storie di Dane e di Terenzio e di Carli e de int che e lotave cuintri lis canonadis dal esercit talian, a àn podût scuvierzi une vore di robis.

Une vore di robis che ur à contât Marghret Cogoviç, storiche e gjornaliste che e rivade drete dal lontan est par spiâ lis vicendis storichis che a stan daûr di chest conflit, cun tant di imagjins che la esperte dal Dark-Web, Astrid Wirilgren, e à metût dongje.

Gnovis che a rivavin di daûr di une bandiere rosse, tant par marcâ la resistence che e jere stade fate in chel an, si ben che nissun, a nivel nazionâl, al fevelàs dai fats.

E si è fevelât une vore ancje di bestiis… propit achì, inte basse, intal ream de magne di aghe, il colubro di esculapio, o biacco, o sin lâts a contâ dal Zamegnis ligneus, la magne di mont, bestie di un mimetisim perfet, che e jere dentri te storie e che e à proviodût a meti ancjemò plui misteri intes peraulis di Serene Vogelin, teutoniche esperte di bestiis e zoologjie che e à contât dut – o cuasi – di chese esemplâr di retil aromai discomparît di passe un secul, ma che cuissà…

Cuissà se al podès jessi pardabon ancjemò in vite. Cussì le pense Mike Berlon, che ain chescj dîs al è in friûl, rivât dret dai United States, propit par fâ indagjinis su la magne di mont e su la possibilitât di avistâle. Mike e Raphael si son confrontâts sul fat, e plui voltis Raphael al à spiegât al merecan come che la peraule “cudumar” o altris similis a volessin dî “persona meravigliosa”. Cjalaiu ca, intune fotografie che e deventarà dal sigûr virâl!

Pecjât dome che i videos che la Wirilgren e steve mostrant no sclarissin se la magne e esist ancjemò o mancul. Misteri…

La serade e je svolade vie cussì, cu lis testemoneancis di Serene e di Margreth e lis performance di Francois, e no cate cualchi fastidi cu la tecnologjie, al pâr che ducj se sedin gjoldude. O si no altri, nissun al è scjampât vie prin o al à tirât ûfs clops o crots frits o pes crût.

Podopo, se o vês di savê come che e va a finîle la vuere, us visìn che o vês di lei il libri “Cryptofriûl” di Rafaêl Serafin, che dongje di cheste maravee di storie ’nd à altris cinc, sparniçadis ator pal Friûl… anzit… atôr pal Cryptofriûl.

E cumò o restìn i spiete che nus domandin un altri spetacul di Cryptofriûl par meti in vore magari una tierce pontade… che insome, e sarà simpri miôr di une presentazion dal libri. 🙂

E us saludìn cun cualchi altri fotografie, de serade, che in gracie dal Comun di Muzane o podìn propit definî une trasmission di sucès!

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît