Biele, biele, biele. Une vore divertente. E senze mancjâ di rispiet a nissun!
CorseCurteOtubar#16 – Flabe

#16 – Flabe
E jere une volte une principesse, cetant supierbeose. E pensave di jessi la plui brave, la plui elegante, la plui valente. Dome une robe no i lave jù: e pensave ancje di jessi la plui brute, par vie dal fat che e jere sclereade. Par chest motîf no lave mai fûr dal palaç.
Une dì, ch’e no rivave a stâ cussì intanade, e à fat clamâ il piruchîr di cort.
– Lucius, tu âs di fami une piruche, che i ai voie di lâ in paîs cence vergogne.
Dit e fat, dopo cualchi ore la piruche e jere pronte: di un maron clâr mai viodût, cui cjavei tirâts sù daûr a formâ come un nît di cign.
Cul vistît plui biel ch’e veve la principesse e à fat la strade grande par rivâ in paîs.
A pene li, une frute si é fermade a cjalâle cu la bocje vierte. La principesse si sintive amirade di chê piçule, e cussì si è dade une sistemade e e à dit:
– Mi cjalistu parcé che o soi la plui biele?
– No, ti cjali parcé che tu âs i stes cjavei di mê mari; o sês dôs gotis di aghe.
La principesse, rabiade come che mai e jere stade, e je tornade vergognantsi tant tal cjistiel e e à fat clamâ il piruchîr.
– Lucius, tu âs fat un disastri. Jo o soi la principesse e o ai di vê une cjavelade come nissune altre!
Il bon om si é metût a lavorâ a une piruche bionde che fin ti inceave di tant che slusive.
E cussì la principesse e je tornade in paîs sigure cheste volte di no vê il so pâr. Intune viute si é fermade une viele a cjalâle impalade.
– Zovine, cun chei cjavei tu mi ricuardis di cuant che o jeri come te, bionde, che cuant che o passavi i fantats a scugnivin sierâ i voi par trop che a jerin imberlîts dal zâl dai miei cjavei.
La principesse, furibonde, cheste volte e à fat clamâ Lucius cun la promesse di metilu a muart se no ves fat une piruche uniche al mont.
A son voludis setemanis, ma la piruche e jere pronte: no si vevin mai viodûts tancj colôrs, e ce colôrs. Cheste volte al jere fûr di dubi: ducj le varessin amirade e, par fâsi viodi miôr si é metude tal mieç de place. Ducj a jein cidins, fin che une frutine e à vosât:
– Cjalait, cheste fantate e somee dute a la gjaline di Meni, cun chei biei colôrs de plumis che e à.
Chest al é stât l’ultin afront! La principesse si é sierade tal cjistiel par agns, fin che no à capît che par jessi uniche e veve di jessi se stesse.
Mai vê pôre di jessi une des tantis.
Mai vê pôre di jessi uniche.
di Alessandro Valoppi (Real Cocål)
#1406
1 comment
This site uses Akismet to reduce spam. Learn how your comment data is processed.
Scrivinus a contecurte[at]gmail.com
Jentre te Liste di Contecurte
Ultins coments
[…] (1998) e l’audiolibri Tananai (2001), la plaquette Le linee di Nazca (2015) e lis racuelte Isulis (2009) e Conseis…
[…] Sosta Urbana, pe regjie di Andrea Collavino. Simpri in prose al à publicât il romanç distopic Kebar Krossè (2016),…
A son passâts pe Ostarie
Adelmo Della Bianca Alessandro Valoppi Alessia Meacci Alessio Ecoretti Angelo Floramo Barbara Battel Bepi Zefon Carli Pup Cecilia Liva Checo Tam Christian Romanini cjadenedicontecurte Covidcurte Day Cristina degli Uomini Davide Peressoni Di Suald DoneBete Dree Venier Eduart Baschera Egle Taverna El Fari Eline Enrico Tomasi Eowin Fantacorsecurte Ferdinando Passone Francesca Giorgetti Franco Marchetta Franco Vigo Frank Spada Fuguline Fulvio Romanin Gaetan Cogôi Galliano di Buenos Aires Gianfranco Pellegrini Gianluca Franco Giuliana Pellegrini Guido Covàs Isa Dorigo Ivano Urli Jacum Tiburzi Jacum Trevisan Jaio Furlanâr Javier Moscufo L'Antescûr Laura Dri Laurin Zuan Nardin Lenart Gjavedon Leonore Lorele la Morete Luche Bagnarol Luciano Marinig Lupo Manarie Maghe Olstrele Marcello Marangone Marcelo Del Mestre Margarite Cogôi Maria Veronica Moscufo Mario Facile Marisa Gregoris Mariute Massim Furlan Massimilian Glîr Maurizio Di Fant Maurizio Mattiuzza Michele Vuardianut Calligaris Michêl Londar Milio dai cjans Nello Malisano Nene Furlane Noemi Salva Norma Romotowski O. Zete Pablo Gortan Passadôr Patrizia Torossi Pauli Fantini Pauli Jacuz Pieri Moràs Pierina Gallina Plume di Ingjustri Rafaêl Serafin Renzo Brollo Renzo Turùs Ricardo Gregoretti Ricart Tiburzi Rudy Citòs Sandri Carrozzo Scoltecurte Silva Ganzitti Spirt Anonim Stefano Gasti Stefano Lombardi Stiefin Asquini Stiefin Morat Stiefin Stefanut Stralunade Tiziana Novello Tommaso Pascolo Zorz Cesaratto





Lasse une rispueste