CorseCurteOtubar#12 – Ultin pas

#12 – Ultin pas

La lûs e je cussì fuarte di là dal barcon che no si viôt nuie. Vuê e je une biele zornade di Vierte e a man a man che mi tiri dongje al ven sù de place un bon profum di tulipans che mi vierç il nâs e mi fâs tant pensâ a cuant che o jeri frutat e o zuiavi cun gno fradi sù pai rivâi dal Inn. A Marktl, in Avrîl, si gjoldeve di chê biele frescure tai arzins, sot dai arbui, e ducj i mascjos si rimpinavin sù pes ramacis dai vencjârs come che a fossin lianis, cirint di no colâ te aghe e fasint i bulos cu lis frutis che a cjalavin di scuindon. Ta chê volte no vevi pôre di nuie…
Cuissà parcè che propit cumò mi ven tal cjâf Marleen cu lis sôs vogladis di armonie e afiet, e chei dopodimisdîs distirâts te jerbe a fâsi dispiets, e chê volte che i ai regalât un mac di margaritis e jê e je scjampade pe vergogne cu lis ganassinis rossis come doi butui di rose.
La ande e je lente, pas dopo pas chel barcon al è simpri plui dongje e la pôre no passe.
Fasio la robe juste?! Isal chest il pont dulà che o volevi rivâ te mê vite?! Vuelio pardabon sierâ dut cussì?! Cuissà ce che e pensarès mê puare mari se e fos vive; cuissà ce che mi disarès par impedîmi di fâ ce che o vuei fâ…
Intant la mê cjaminade no si ferme e ator ator mi pâr di vê int che mi sburte a lâ su chel maladet barcon, o sint vôs che mi disin di fâ svelt, che e je la robe juste, la uniche pussibile aromai.
Cumò che mi mancje un pas sôl o pensi a Diu. Cuissà ce che al è dopo la muart. O cjali adalt e o domandi al cîl se al è cun me. Isal pront chest cîl blu come lis aghis dal Inn a ingrampâmi cui siei nûi, aial voie di braçolâmi pe eternitât?
O soi rivât tal ôr dal barcon e chest al sarà l’ultin pas di Joseph. Dut ce che al jere nol esistarà plui… e une sensazion di pâs cosmiche mi cjape dentri. Une completece te anime si fâs indevant par dâmi la fuarce pai ultins moments. O sint une tenare man che mi cjarece elegante il spirt.
O soi pront, la pôre si sfante, mi lassi lâ…
“Nuntio vobis gaudium magnum: habemus Papam, cardinalem Ratzinger ”

di ***
#1***

1 coments On CorseCurteOtubar#12 – Ultin pas

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît