CorseCurteOtubar#03 – Il non di mê mari

#03 – Il non di mê mari

Al veve un savôr strani il lat di mê mari, cuant che, a pene nassût, i tiravi lis tetis. Al jere un savôr… ce maniere dî? Ben, sì, al saveve di pôre. Pôre che lis tetis a si suiassin prime de mê fam.
I tremavin di pôre lis mans a mê mari, cuant che lis bombis che a sclopavin intal paîs a tiravin jù cjasis cu la int dentri.
E tignive strentis lis lagrimis di pôre, mê mari, cuant che e saludave il so om, gno pari, che al scjampave suntune barcje par lâ a prontâ par nô un tichinin di sperance, di là dal mâr grant.
Une pôre penze e ingropave il cûr di mê mari, mi tignive pe man, sul ôr di une altre barcje, dute scloteade, e la tiere e jere lontane, tant lontane e il so om al jere cuissà dulà inta chê tiere foreste.
I sacodave di pôre il grim a mê mari, che nol vedi lassade une samence dentri chel om trist che le veve ingrumade intal cjanton dal camaron, lì che o spietavin ducj une altre barcje.
O ai vosât jo, dute une gnot e dibant, cuant che une vongule triste le à sbregade jù de barcje e le à puartade vie, e siei voi disperâts a cirivin la mê man, inneâts inte pôre.

Su la tiere ferme, une femine blancje, cu la petorine zale, mi fevele, dute zentile. E dopre lenghis che no cognòs. Fin che o rivi a capî che mi domande se o sai scrivi. E di scrivi lì il non di mê mari.
Ce aio di scrivi?
O scrîf pôre.
Mê mari e veve non PÔRE.

di Laurin Zuan Nardin (Lupusinfabula)
#1393