CorseCurteOtubar#02 – Lis mês amiis

#02 – Lis mês amiis

Zuan, Marte e Gjonde a son ator par Palme come lôr solit. A vevin fat un zûc di mostrâsi lis fotos di cuant che a jerin piçui.
“Viodêt? Pensait che o eri nassût ancjemò cun il sachetut intor!” al fâs Zuan a lis amiis.
“Pardabon?” i fâs Marte un pôc plui serie.
“Sì ma no savês cuâl che al è stât il gno prin ricuart!”
“E ce che tu vûs, visâti di chê volte?”
“O mi visi parcè che o mi eri insumiât un gno parint che al ere muart, che al mi diseve alc ma o no rivavi a capì!”
A pene che al dîs chest, lis frutis a deventin dutis dôs tant scuris, a lu cjalin mâl come se al ves fat alc di brut. Lui al reste blocât, a nol rive a movisi, chês altris a van vie cence disi nuie.
“Ce che i è vignût, o no mi pâr di ve dit nuie di mâl, parcè che a si la saran cjapade cussì?”
Plui tart i rive un messaç da Gjonde: Viodìnsi cheste sere in tal baluart Donât.
Lui al rispuint: Dacuardi.
“Cussì a mi disaran ce che a lis à fatis rabià”.
Cuant che al rive al incuintri al è scûr e, a fâ lûs, e je dome une lune rosse. Al rive a viodi une sacume che e ven viers di lui, le ricognòs: e je Gjonde. Ma cuant che al fâs par saludâle al reste blocât. Marte a lu ten fer intune maniere che a nol rive a fâ nancje un moviment, come se al fos intune buse. Gjonde intant e ven dongje ma lu cjale cuntune rabie intai voi che a nol varès mai pensât, in man e à un baston che, a la lûs da la lune, al riflet come une lame.
“Benandant bausâr, cumò tu le paiarâs!”
“Ma ce dîstu?!” Ma chê altre a no lu sint e e ven indenant, Zuan al cîr di cjacarâ ancje cun Marte: no i rispuint, e strenç simpri di plui, tant che al si sint scjafoiâ. “Ce che o varai fat par pierdilis? A nol è pussibil, no! O no soi mai rivât a vê da lis amiis come voaltris! No!” E al tire une berlade che al piert i sens. A si svee dongje di lôr e al cjape une pôre di chês.
“Trancuîl, scusinus, o vevin pôre che tu volessis fânus dal mâl …”
“Cemût, lôr a vevin pôre di me?” al pense.
“Tornin a jessi amiis?” i fasin lôr.
“Tornin amiis!” al rispuint lui.

di ***
#1***

1 comment