CorseCurteOtubar#01- Sium, bêçs e flât

#01 – Sium, bêçs e flât

“Mame! Mame!”
La sô vosute cence fuarce e romp il cidin de gnot.
Mi tiri sù dal jet, i voi scocolâts e une voie mate di mandâ indenant chel sium cetant biel, li che i nadavi intune pissine plene di bêçs di ogni misure.
Discolce, i rivi inte cjamarute. I scûrs e lassin passâ doi rais di lune cussì blancs e sflandorôs che al somee dì. “Amôr, ce âstu?”
Alberto, cuatri agns, al à la musute imbombade di lagrimons. “Vuelistu che mi meti dongje di te intal jetut?”
Al môf il cjavut indenant e indaûr e mi grampe une man.
“Mame! Mame!” mi torne a dî.
“Ce isal, amôr gno?”
“No tu jeris plui…” al cisiche, e chês peraulis pesantis come claps i glotin la vosute. Mi pâr che i soi vogluts, che a varessin di sedi piçui di sium, a sedin deventâts grandonons, che i vedin cjapade dute la muse. Cumò al vai pardabon cence padin. “Invezit i soi achì, cun te.”
Lu niçuli, lu figoti e i cjareci i cjavei.
“No tu jeris plui, no tu jeris plui…” Si indurmidìs di bot, il dedut inte bocje.
I torni biel plancut inte mê cjamare. Cuissà se i rivi a tornâ a cjapâ il sium là che lu vevi lassât.
Timp doi seconts e i soi che i nadi cui bracs distirâts, freestyle.
La pissine no finis mai, largje e lungje al infinît. Intun moment si jeve un aiarat e denant di mê si môf la ale di un pes. No, nol è un pes, al è il cjan di mâr. Si svicine nadantmi ator ator.
I sint i sgrisui cori pes gjambis fin intal fîl de schene, daspò alc mi tire sot dal mâr di bêçs dentri intun neri, scûr come in bocje. E no soi plui.
” Alberto!” i berli cuant che mi svei. I ai di vê tignût il flât a dilunc, la vôs mi ven fûr a grops. Mi ingredei par rivâ inte cjamarute dal gno frutin, nancje fossino chilometris e no pôcs metris di coridôr. “Mame! Mame!” La so vôs e sune contente cumò, la pôre e je passade.
“Mi tegnistu intal to jetut?” i domandi. Un pêl mi vergogni: fâmi figotâ di un frutin!
“Ven, mamute. Ti vuardi jo!” Se no fos tant cjamade di fife, mi vignarès di ridi.

di ***
#1***

1 comment