CorseCurteSetembar#09 – La scune di Toni

#09 – La scune di Toni

Al jere une volte – cumò al è von – un biel zovin, a pene maridât.
La sô biele femenute e jere in stât interessant. Ducj i doi a jerin une vore contents.
Si domandarin come che a varessin fat a cjatâ i carantans par comprâ le scune.
«Le scune, le fâs jo, cun lis mês mans», al disè Toni a Lussie.
«Sigûr, ma cemût? Ti coventin il len e il martiel e la siee e daspò la plane e i clauts e…»
«Sta trancuile. Doman larai là di me barbe Gjovanin Marangon e lui mi judarâ».
In chê gnot, Toni nol rivâ a durmî une lûs. Intal sium, al dissegnâ la scune plui biele dal mont.
La matine dopo al jere a cjase dal marangon, prin che al vierzessi  buteghe.
Cuant che Gjovanin al rivà, lu viodè e i disè: «Ce vûtu vê di me, Toni?»
«Varès bisugne di len, martiel, plane e clauts e lane di veri par fâ la cune par me fi».
«Planc, planc, e jo intant ce fasio? O ai di lavorâ jo, no soi migo pierditimp come te che tu zuis a fâ scunis».
Toni, avilît, al tornà a cjase. Ma prime di jentrâ si fermâ li dal arbul dai problemas.
Ven a stâi che lui al veve un arbul dulà che, ogni sere, al picjave i pinsîrs bruts, cussì al vierzeve la puarte di cjase cun gjonde e al jere content cun la sô femine.
Si sintive lizêr, come che se Gjovanin Marangon i ves dite di sì pai imprescj.
In chê gnot si insumiâ cuntune scune che e jere une maravee: piturade blancje, cuntun floc celest e un colôr di rose, fate par drindulâ e cuntune cuviertute di lane morbide come un nûl de Vierte.
A pene sveât, al viodè dongje dal jet, in biele mostre, dut ce che i coventave: len di pin di prime cualitât, siee, martiel, clauts, lane di veri e plane.
Ducj i imprescj a jerin dentri di une scjatule, ben in ordin.
Un biliet in bande: “Par te e pe vuestre creature. Viôt di fâ un biel lavôr”.
Firmât: Gjovanin Marangon.  Daspò Santul di batisim.
In chê scune a an durmît i trê fîs di Toni e Lussie e i siet nevôts.
E je ancjemò une biele scune.
In spiete seneose di nicjulâ tancj, tancj frutins.

di Pierina Gallina (Gjaline Padoane)
#1367

2 comments