CorseCurteSetembar#05 – La furmie

#05 – La furmie

“La furmie! Dami la furmie!”
Cussì al diseve sâr Carli al so garzon. Il paron al voleve cussì staronzâ lis dôs vitrinis de buteghe dopo vê tacât i blecs adesîfs de UNVO, une note dite di distribuzion di alimentârs, tirât vie lis telis di ragn e cambiât la cjarte crepe sclaride dal soreli. E jere une vitrine bielzà pronte cui prodots come un gnûf fust di Olà, un bidon di flit Superfaust, un tetraedri di lat e altris robis. Naturalmentri sâr Carli al veve fat un truc pal lat: une buse inte base par disvuedâ il tetraedri: se no il lat, ancje se a lungje conservazion, in chê vitrine al sarès lât di mâl distès. E dopo e jere ancje chê altre vitrine, plene di curiose robe folcloristiche. Tal mieç e jere la puarte cun trê scjalins e parsore la scrite CARLO V. – COLONIALI VINI LIQUORI GRANAGLIE, fate ancjemò ai timps de vuere di Abissinie e plui voltis ritocjade. Naturalmentri la buteghe e veve lis scansiis altis.
Te vitrine folcroristiche a jerin une smuarse pal presut, une bree taronde cul mani di chês par butâ la polente cun parsore un biel disen di fasan, tocs di rams ingherdeâts e piturâts cu la vernîs trasparente e dopo chel strani imprest che Pieri nol saveve propit a ce che al coventàs.
Ma jerial propit un imprest? Al jere di metal. Al veve une forme di losanghe, al sameave une sorte di bocje e i ricuardave un pôc chei organisims marins che al veve viodût a scuele sul libri di Osservazioni Scientifiche.
“Insome, Pieri, dulà ise la furmie?”
“Vêle ca, sâr Pieri, le ai ben lustrade cul Sidol ancje se no sai propit ce che e je e a ce che e covente. No samee nancje une furmie. A mi chest imprest mi ricuarde pitost une bestie, une bestie rare che e vîf tal mâr. Lu ai imparât intun libri di scuele”.
“Bestie tu sês tu, pote! Sêstu cussì indaûr? No tu le viodis? Cjale che tu sês saltât fûr di lì ancje tu, come ducj!”

di Checo Tam (Tapioca City)
#1363

2 comments