CorseCurteSetembar#04 – Grancj e piçui

#04 – Grancj e piçui

Meni al jere un om normâl di fisic, magari di muse al jere ancje brutut, cui dincj in fûr e lis venis varicosis ben sglonfis intes gjambis; simpri seri, al cjacarave pôc e cuasi cun nissun, al lavorave te fornâs dal paîs e nol veve morose.
Dut al è scomençât cuant che, intai agns Cincuante, a jerin ancjemò vierts i famôs “casins”, e lui, pene che al à fat i disevot, al à podût jentrâi dentri par sintîsi finalmentri un vêr om dispatussât. E je lade a finîle però che lu àn parât fûr di corse, parcè che al veve un imprest talmentri plui grant dal normâl che nissune des “siorutis” de cjase, ancje lis plui navigadis, espertis e di “tignude”, se je sintude di contentâlu!
Di chê volte si è sparniçade la vôs sul Meni, che par ducj subit al è passât al sorenon: ”Meni Mani”, o pûr ancje “Meni Bighe”. E cuindi ve spiegât parcè che nol veve morose e nancje tante voie di ridi…
Ma i siei amîs, soredut cuant che si jere in Istât e si lave a fâ il bagn tal Judri, i disevin: – Dai Meni, fânus il piroscafo! – Alore lui si meteve distirât te aghe, e cul imprest par aiar al faseve la nâf che e navigave sul mâr, e cu la sô vôs gruesse e profonde al imitave il sun de sirene: e ce spetacul, ancje pes frutis che a jerin là, che a restavin a bocje vierte par un biel pôc! Mi risulte che cul timp lui al vedi continuât a lavorâ te fornâs e si sedi parfin butât tal bevi…

Pieri invezit al jere un biel zovin, unic fi di paron di fabriche cun tancj operaris, e destinât cuindi a vê e cjatâ feminis in dutis lis ocasions. Ma cuant che lu àn clamât a fâ la visite di leve a Udin, che ti tignivin in caserme par trê dîs, si doveve fâsi la docje ducj insiemi, e par fuarce si mateave un pôc, si fasevisi scherçs e cu la ocasion di jessi ducj crots, si “misuravisi” l’imprest; e propit alì al è saltât fûr che il biel e grant te storie Pieri… lu veve piçul piçul! Sorenon a colp, ancjetant storic: Pierino il breve!, che al à scugnût sopuartâ cun fastidi di chê volte in poi.
Lui comuncue intal timp si è cjatât femine e fat ancje trê fruts, e si pues dî che al vedi fat une vite avonde normâl, ancje se par lui e jere za pronte la cariere di paron di fabriche. Ae fin però mi ven di pensâ, fevelant di imprescj grancj e piçui, che nol è dit che cui che lu à grant al vedi par fuarce la strade splanade inte vite, e cui che lu à piçul nol è che i sierin lis puartis inte muse.

A noaltris oms no nus reste che consolâsi ducj cuancj cul tignî a bon ce che la nature nus à dât…

di Renzo Turùs (Il Fi di Marie dal Cafè)
#1362

2 comments