CorseCurteSetembar#02 – Il savon di Arturo

#02 – Il savon di Arturo

Mi clami Arturo e o fâs l’inventôr. Sissignôr: inventore. La prime invenzion le ai vendude tancj agns indaûr al Comun di Mortean, un imprest par lis mierdis dai cjans, che al spant un prodot ecologjic in maniere che no si tachin sot des scarpis. Cualchi timp daspò, cu lis machinis che a corevin tant che fusetis su la statâl, un grop di zovins a vevin vût la pensade di semenâ veris sul asfalt. Une su dôs a lavin a finîle intal fossâl cu lis gomis sbusadis. Ma i fruçons a restavin par mês e mês su la strade, e cuant che si lave in biciclete di Udin a Puçui doi su trê a finivin intal canâl. I Sindic al vignì intal mê laboratori e mi domandà di studiâ la cuistion.

Pense che ti pense i ai preparât un gnûf imprest, une invenzion cetant inteligjente inte sô semplicitât, une curdele adesive largje tant che le statâl, che a cjape su ducj i veris, picinins, grancj e invisibii, e ancje le mierde dai cjans: ça va sans dire, la invenzion dal imprest ch’al pestave la mierde dai cjans nol covente plui. Ma il Sindic tratignì i bêçs. “Par lis spesis,” al disè. Ce brave persone, pecjât che al à esaurîts i doi mandâts di prassi.

In cheste setemane o varès di consegnâ la ultime novitât. Al è doi agns che le studii, dì e gnot, cence padin. Si trate di un savon par lavâsi. Se tu sês un stupidat, ti lasse su la piel lungjis riis neris che no si gjavin nancje cu la varechine. Mal àn ordenât i doi partîts che si sfidin a lis prossimis elezions comunâls di un paîs chi dongje. O ai di ameti che le ai fate sporcje: o ai vendût  il brevet a ducj doi… A vuelin regalâlu ai lôr candidâts par scuvierzi cui che al merete pardabon. Lôr, invezit, a disin che no si lavin. Par no fâ diferencis, o volarès ufrî l’imprest a la formazion “centrista”: cuatrimil euro par cualchi litri di savon di doprâ di scuindon… No si sa mai. Se al funzione, i ai bielzà prontât un messaç publicitari di mandâ a Rome, mi mancje dome di decidi a cui che no ai di spedîlu.

di Silva Ganzitti (Copasse Blu)
#1360

2 comments