CorseCurteAvost#02 – Tai tiei voi

#02 – Tai tiei voi

Tramont ros e monts misteriôs.
Monts misteriôs a son intaiâts dentri di te, tai tiei voi.
Piçul cuarp voladi, piçule figure fuinte.
Tai tiei voi o viôt un tramont ros. E monts misteriôs.
O torni te mê infanzie cuant che ti viôt. Cjavei ros. Biei cjavei di sede.
O provi une stiletade par alc che no ai mai vivût.
Tu sês part de mê infanzie! Ve cui che o spietavi, secui indaûr, cuant che mi scjassavin i temporâi dal Istât.
E tu dulà jeristu ta chê volte? Jerie forsi dentri di me une tô pivide?
Forsi no ti vevi viodude come femine fate ma come frutine. E o vevi zurât: tu sarâs mê!
Ti vevi dismenteade e, tornant a vioditi plui tart, no ti vevi ricognossude daurman ma tu mi vevis condizionât bielzà ta chê volte, tal lontan passât.
Cuant sêstu nassude? Cuant che jo o jeri ignorant dal mio destin. Se tu mi tiris dongje alore al vûl dî che al è alc di vicendevul.
Biei cjavei di sede rosse, piçule figure fuinte.
Cul tramont ros tai tiei voi!

di ***
#1***

1 coments On CorseCurteAvost#02 – Tai tiei voi

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît