CorseCurteLui#18 – Cence, masse

#18 – Cence, masse

Catine si spiele tal pantan dulà che prime al jere il piçul lât e, clâr, no viôt la sô muse ma dome une concavitât maron. Ator, jerbe zale: ce che al reste dal prât sflandorôs di prime. Il cîl al è turchin cence misericordie, nol è nancje un nûl. Nol plovarà nancje vuê.

Tanvir al fâs part di pôc dal cuarp dai volontaris, cheste e je la prime volte che al lasse il lavôr – darest cemût fasaressial a lavorâ in chestis condizions? Il barachin di pes sec lu tornarà a vierzi cuant che al podarà. Dopo che sô sûr Aghanashini je stade glotude dal pantan… Tanvir al decît di no pensâi cumò: lu clamin, bisugne lâ. Al monte su la barcjute insiemi a chei altris, a sperin di puartâ in salf cetancj di chei che no son inneâts e che magari a son sorevivûts tignintsi al tet di cualchi cjase. Dopo des plois cence padin che no an molât par dôs setemanis, i flums a àn invadût la citât che cumò e je cuvierte di un mignestron puçolent e mortâl fat di aghe, pantan e cadavars. Ogni tant de aghe a saltin fûr ogjets de vite cuotidiane di cualchidun che no ju cjatarà plui. E che forsit no si cjatarà plui nancje lui. Tanvir al spere tant di cjatâ Aghanashini ma lis pussibilitâts che e sedi vive aromai a son bassis.

Il soreli al scjalde di murî come se al volès brusâ la umanitât. Ma Catine e sa che il soreli nol à une sô volontât. E je ore di gustâ, miôr tornâ a cjase. In television a disin che nol reste che preâ pe ploie e spietâ. I agricoltôrs a àn scugnût rinunziâ ae soie par salvâ la blave. Che e covente, ancje chê, par nudrî lis bestiis di arlevament. “Mi mangji un hamburger”, e pense la zovine.

Aghanashini e je stade cjatade. O almancul si pense che e sedi jê, bisugne che cualchidun al ledi a ricognossi il cuarp. A Tanvir i sune il telefonut. “Cumò o rivi”.

di Margarite Cogoi (Volketitrai-Liga)
#1327

2 comments