CorseCurteAvost#17 – La ore plui biele

#17 – La ore plui biele

— Ben cjalait! Cheste volte o pues dî che o ai sielt pardabon un biel orari pe robarie! Ducj a pensin che i laris a lavoredin vie pe gnot, tal scûr, cuant che chei altris a duarmin. Parcè? Vonde chest lûc comun, chest preconcet. E scusait se cumò mi sbrochi! Un lari nol è mico un mone! Al pense, al progjete, al met adun esperiencis, come un vêr professionist! E no dome! Un lari nol è mico un toc di fier, insensibil, distacât, frêt. Al à un cûr e al pues jessi ancje romantic! Sì, o vês sintût ben: ro-man-tic! Eco parcè che o soi dut braurôs di ve sielt la ore plui biele pe mê robarie: cuant che il soreli al va a polsâ. Insome al sarà pûr biel lavorâ intant che un biel amont… cun la sô lûs rosse… e zale… il tai dal lusôr… spiete che cumò mi incee… i siei colôrs cjalts… no viôt il fîl just dal alarme… lis montagnis pituradis… se o ves di sbaliâ, la polizie e rive intun marilamp… spiete… alore… i nûi segnâts dai rais dal soreli… Eco al varès di jessi chest il fîl just… no viôt ben… il soreli mi svuarbe…

Tac!

Oeoeoeoeoeoeoe!

di ***
#1***

1 coments On CorseCurteAvost#17 – La ore plui biele

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît