CorseCurteAvost#05 – Il tramont

#05 – Il tramont

Di adalt da la culine
o viôt che va calant,
chê grande bale rosse
che dâ di lûs sul mont

E dut ator, ator,
il cîl si met in fieste,
doprant chel vîf colôr
a intenzi le sô vieste

Daûr dal cjampanîl
Siemit l’ultin glon,
chel astri lusorôs
ben planc al va in scuindon

Al ven glotût de tiere
metint il cîl tal scûr,
cul timp che fûr al siere
la ore sul lavôr

E il cidinôr si poie
da mont a la marine,
cul dì che si inzenogle
ai glons di chê cjampane

E dentri il dì ch’al mûr
jentrant inte gnot scure,
ognun al si confronte
te ataviche sô pôre

Di tant in tant lontanis
si sintin vôs tal scûr,
e son daûr che clamin
cui tarde al fogolâr

E ancje dentri il bosc
ogni nemâl si pare,
sigûr inte sô tane
sierant difûr la pôre.

di ***
#1***

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît