CorseCurteAvost#04 – La promesse

#04 – La promesse

L’amont al si nunziave cussì biel che mai. I rais dal soreli a rivavin dongje un tic smavîts, e dut intor al si vistive di colôrs inmagants.
Ma no vevi timp di metimi a cjalâ chel spetacul. O vevi di tignî la promesse che o vevi fat a me stes, di rivâ a cent prime di gnot. Cent nemîs. Amoreos. Cent nemîs. Copâ cent nemîs amoreos.

La bataie e jere lade indevant dut il dì, e e jere lade ben, il Signôr al jere cun nô, no vevie di lâ ben?!
E chê promesse o jeri sigûr di podê tignîle. Ma cuant che mi visai che il soreli al jere daûr a lâ jù, mi cjapà imbast.
– Paron o sin rivâts a 79 – al mi disè il servidôr che al mi tignive i conts, parât daûr di un bocon di scût.
Doi ju fasei fûr intun colp sôl cuntune copete de spade, un altri lu sfracaiai sot dal cjaval.
Ma al jere tart, masse tart. Al jere ancje dificil di brincâ vonde nemîs, ducj a scjampavin vie di buride, dulà vevio di cjatâ fûr disevot di lor?
Alore la idee: SORELI, FERMITI SORE GABAON!
Dit e fat al mi ubidì. La dì si slungjà al gno comant.
E alore cun calme o soi lât ator a cirî i miei 18. Un ca un là.
Cuant che o ai tirade fur la mê spade dal pet dal numar 100, o ai vosât un berli che al à fat tremâ la tiere imbumbide di sanc.
Po i ai dât il permes al soreli di tornâ a movisi e mi soi fermât a cjalâ l’amont. Ce biel rimirâ l’amont sentât suntun grum di cadavars dai nemîs.
E po, dutun colp, scûr tant che in bocje.
O soi stât jo, Gjosué, l’unic om inte Storie a fermâ il soreli. Un miracul. Diu al jere cun me. O vevi di finî di copâ i miei cent nemîs. Ducj intune dì.
Provait vualtris a fâ miôr!

Eh, Giosuè! Al è stât un inte Storie che al à fat di miôr. Nol à fermât il soreli, no, chel no. Ma al à fat nassi un soreli gnûf. Une matine di Avost intal cîl di une citât dal Gjapon. Al è durât pôc. Ma cuant che chest soreli al è lât amont, i muarts che chel sioret al veve fats no jerin cent, ma otante. Mîl. Otantemîl.
Ce biel amont! Sui cadavars dai nemîs!

di ***
#1***

2 coments On CorseCurteAvost#04 – La promesse

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît