CorseCurteLui#15 – Chicarrones

#15 – Chicarrones

Carli al nadave content cui braçai di salvament prime di finî glotût de pilete de pissine dal Palamostre a Udin.
Carli al jere un frutut simpatic di 7 agns, cu la ridade simpri in bocje. Al jere la consolazion di so pari e sô mari.
Carli al jere sec come un ragn cun chei vuessuts che a stavin adun par miracul, al varà pesât 15 chilos.
Ma Carli nol è plui. Supât dal flus de aghe jù pe piletone de pissine ta une maniere che no si rive a sclarî.
Ma Carli par fortune nol è muart.

Te mega vile dal multimilionari cinês Zhang Lin a si è sintude une grande tonade, un sclop come di bombe. Il siôr e la siore Zhang si rilassavin mangjant un sandwich di pechinês in salmì a ôr de pissine cuant che, come il stropul di une boce di Cinzano d’Asti, al tonave par aiar, potent come un missil, un frutat! Par fortune la traietorie e je stade perfete e al è colât te aghe ancjemò cui braçai intor… tu puedis crodi il siôr e la siore Zhang ce raze di spac e ce maravee!

Cressint Carli Zhang al passave lis zornadis a ôr de pissine, cjalant la pilete cul magon, sperant di viodi se là di là  cualchidun al fos daûr a cirîlu. Al mangjave come un mat, pues stâi pal gnervôs. Rafioi, raze lacade, purcit in tocj dolcegarp e rîs, cuintâi di rîs ogni dì. Aromai al pesave 95 chilos. A 10 agns e ogni dì che al passave al veve plui fan. Ma dentri dal cûr al jere plen di sconfuart e al voleve dome tornâ ae sô vite di une volte, ai siei parincj, ai siei amîs, a la sô tiere. Tra un gjambar frit e une vaiude e rivave simpri la sere e si sa che la sere e incrès l’aviliment. Cussì une gnot si è butât sot aghe e al à gjavade la pilete, al à provât a jentrâ dentri tal bûs ma al jere masse gras… ma sburte e frache, poche e stoche…

eeessSSLICCcc!

Come un missil ipersonic Dong Feng 5, cuntune lengate di fûc rosse, al è sgorgolât fûr di une fontane grandone tal plen di une sagre di cuartîr a Mexico City. E jù mariachi cul guitarròn e bibitis gasadis e chicharrones che no je maniere di dimagrî nancje se tu vuelis in Messic.

di Rudy Citòs (Borussia Dordul)
#1324

1 comment