Il barbe dal Canadà

Finalmentri Zuan al podeve dedicâsi a une des sôs passions: i avions di cjace. Soredut l’AVRO CANADA CF-105 ARROW. Il misteriôs progjet canadês blocât dai americans.
Zuan al veve imparât dut su chel aparât: i components in titani, i comants fly by wire, i missii Canadair Velvet Glove, il sisteme di combatiment Astra… Cumò al veve di lei dut su la riscuvierte dai progjets che a si crodeve pierdûts. Un dopomisdì in perfet stîl nerd. Ma nol saveve che al è propit cuant che a si è dal dut cjapâts intune robe che e rive le classiche sunade di campanel e a moments si cole de cjadree. Sacramentant, al cor a viodi cui che al è vignût a rompi. Cuant che al vierç, le rabie di colp e devente maravee: Marte e Gjonde, lis sôs amîs, e son vignudis a cjatâlu.
“Ciert che no ti passe propit nuie!” i fâs Gjonde, viodint lis ricercjis intal ordenadôr.
“Ma parcè pierdistu cetant timp daûr di chestis robis?” e ribat Marte.
“Gno barban, al jere un inzegnîr, al veve lavorât cun Sergio Stefanutti intal progjet dal SAI AMBROSINI SS4 dopo al jere migrât in Canadà e lu vevin cjapât su a la AVRO. Cumò a àn riscuviert i progjets e stavi viodint lis ultimis novitâts.” i rispuint, e dopo i conte di cuant che al jere stât al museu di Ottawa e al veve podût viodi un dai motôrs ORENDA PS-13 IROQUIS.
“Di bon che o sin vignudis, se a nol fos par noaltris tu staressis dut al dì daûr dal ordenadôr o da la television!”
“Su, no stait a jessi tristis cumò…”
“Ma sint chest, Marte, noaltris si din da fâ par tirâlu fûr dal so bûs e nus dîs ancje tristis!”
“Cheste a ti costarà Zuanut …”
“Ma no, no volevi disi chest, dome no capìs parcè che mi criticais tant.”
“Dopo, une altre robe, ti è mai vignût il dubi che ancje to barban al vedi tignût part dai progjets?”
Zuan a si bloche. “Sono chescj par câs?” Marte i mostre un bloc di sfueis blu scrits in blanc.
“Dulà ju âstu tirâts fûr?!”
“Cuant che tu vevis spiegât che il motôr di chel avion al jere come doi motôrs un dentri chel altri o vevi capît che dentri chel comodin al veve di jessi platât alc!”

di Luche Bagnarol
#1282

1 comment