CorseCurteMai#23 – Dopo de ultime gnot

#23 – Dopo de ultime gnot

Usgnot passade e je stade la ultime.
La ultime gnot che jo e Marte o vin durmît te stesse cjamare. O diu, durmît… si fâs par mût di dî. La centesime barufe, butâsi in muse cun tristerie lis solitis lagnancis, e dopo chel remenâsi mareôs, schene cuintri schene…
Ma o ai decidût: di usgnot o duar te stanzie piçule. Cul jetut pleabil al reste a pene il puest di movisi, ma miôr chest che no frontâ une altre gnot cun Marte.
Tal imprin o fâs fature a usâmi al cidinôr, ma mi distiri a cuatri di bastons e mi gjolt il scûr penç tant che un vilût neri. O duar di un continui pe prime volte dopo mês.
Ore di jevâ. O impii la lûs tal coridôr: no va. Si sarà sfulminade, come chê sfulminade di Marte! O fâs lûs cul telefonut, e o resti incocalît: chest nol è il solit coridôr!
E je une stanzie dute blancje, devant di me dôs puartis, une blu e une rosse. O passi par chê rosse e o soi intune altre stanzie mai viodude, cun altris dôs puartis: une alte e strete e une basse e largje. O passi par chê alte e o rivi intune gnove stanzie, simpri cun dôs puartis, une colôr dal lamp e une colôr tampieste. O sielç la tampieste. Lis puartis dopo a son une plene di lusutis e une nere e smuarte. O sielç lis lusutis, ma chestis stanziis no finissin mai! O voi indevant a sielzi in mût casuâl, ma a passin oris e o soi strac! Isal un sium o stoio dant di volte?
Ancjemò une stanzie, ancjemô puartis, ma cheste volte mi àn alc di familiâr: une verduline, come la 126 che e veve Marte cuant che si sin cognossûts, chê altre zale come il vistît de mê coleghe Cristine. O sielç chê zale, ma o tiri il flât a grops.
Lis puartis di dopo a son une colôr gjat tigrât e une che e somee a lis plumis dal uciel biel vert. Mi visi di Pallino, il gjat ruspiôs di Marte, e dai uciei che o viodevi cuant che o lavi a pes, e çuetant o sielç la plume.
Gnove stanzie, gnovis puartis: une sfodrade di rosis di cjariesâr, chê altre di strafuei fof e fresc. La prime mi fâs vignî in ment un viaç tal Gjapon, la seconde un prât dulà che jo e Marte si distiravin a cjalâ i nûi. O sielç il cjariesâr, e o coli distirât.
O ai capît che la cjase e vûl dîmi alc, ma o soi masse strac e lis fuarcis mi bandonin. Rivaraio a lâ fûr di cjase mê?

di Stralunade (Atletic Gjatui)
#1281

2 comments