CorseCurteMai#21 – Il cûr de cjase

#21 – Il cûr de cjase

«Che mi vegni daûr te cjase»
Sul inprin, a sintîmi a dî cheste frase, o restai un pôc stranît.
La siorute si fermà sul soiâr de puarte e mi smicjà. Un piçul riduç i disgredeà un pôc chel sgjarp di grispis che e veve ator pe muse. Si viodeve benon che e veve capide la reson dal gno cencenament.
«Ma lui no studiavial la lenghe, lui?»
Becât.
«Siore sì. Come che i ai dite, o soi a vore pe Universitât e…»
La siorute e niçà il cjâf e e zirà i voi, simpri riduçant. «E no tu sâs ce che e je la cjase, nini?»
Jo o continuavi a restâ come di clap. Sì gjo, parcè che jo o jeri ZA dentri te cjase, tal ingrès.
«Siore, o ai pôre di no vê capît. No sino za te cjase?»
La siore mi fasè alore mot cu la man di stâi daûr, e mi menà intune altre stanzie. A pene jentrât, mi fasè sintâ suntune bancje dongje de taule, propite sot dal lunari di Frate Indovino. Par dut al jere un bon odôr lizêr di stiç e di mangjative.
«Metio sù un cafetut?»
«Graciis»
La siore e vierzè une vitrinute per cjoli lis cjicaris. I cjantons dai veris a vevin ducj o santuts, o fotografiis, o cartulinis.
Daspò di vê poiadis lis cjicaris, la siore e prontà la cogume e le metè su la lastre dal spolert, là che il fûc al jere simpri impiât e al pandeve un biel clip par dut l’ambient.
La siore si netà lis mans suntun peçot che al jere poiât su la mantie dal fôr, e intant che e spietave il cafè mi tornà a cjalâ e e riduçà.
«CHESTE e je la cjase»
La mê espression di sorprese le fasè ridi di gust.
«Cemût la cjase?» disei jo. «Che scusi: no sino te cusine?»
«Par furlan, la cusine e je la cjase» mi disè jê. «Ma no je robe che si cjate tai libris de universitât. Dome noaltris vielis le clamìn ancjemò cussì. Al è chenti che si fâs dut. Si mangje, si bêf, si cjacare. In sumis al è ca che si vîf. Lis altris stanziis a son di servizi, ma cheste e je vive, e je il cûr de cjase furlane. Par chest une volte si le clamave “cjase”. In dì di vuê no la si clame plui cussì. Magari cussì no lis cjasis di vuê no an plui un cûr».

di Enrico Tomasi (Barba Pisul Stentadizza)
# 1279

2 comments