CorseCurteMai#17 – Intifada

#16 – Infifada

Par
Noura Shehadeh
Ramallah – Palestine
Al Anbeya’, 11

Jabaliya – Ai 6 di Dicembar 1988

Lûs de mê vite, al é bielzà un an che nô dal cjamp dai dispatriâts o lin indenant a fâ ce che o podìn e ce o crodìn just pe nestre int, ancje par chê che a sta li di voaltris. Aromai chi, ancje ator dal cjamp, si é mudât dut in spaltadis e fûcs. Jo o soi simpri daûr di une baricade un pôc fûr, des bandis di Atatra. Chi cualchidun al si met a piturâ soldâts ch’a cjaminin su la bandiere israeliane, ma la realtât e je ben difarente; a Jabaliya a passâ sui nestris cjâfs e su la nestre dignitât a son lôr, i ebreus, e cun lôr i soldâts palestinês, che par un nemì ch’o copìn a fasin fûr dîs dai nestris. O ai fife, Noura, tante. Al baste cjalâ il soldât sbaliât tal môt che no i plâs par jessi cjapât par un colaborazionist. O varessin di fâ vuere al nemì e, al contrari, si fasìn dal mâl fra di nô.
Si va indenant a tirâ claps. Al somee ch’al funzioni ogni tant, ma ce podie il clap cuintri il plomp? Il clap al sbalce, il plomp al jentre!
Par i fruts al é deventât un zûc, un dai pôcs ch’a podin fâ, chel di cjoli sù i claps tai podins e puartâju a nô grancj… se grancj lu sin pardabon. A son zornadis là che ju tirìn tant par tignîsi in alenament. O provìn a centrâ un casson lontan, un grum di tiere o un pâl, e al va dit che jô o soi propit brâf, o ai plui smicje di ducj i miei compagns. La mê specialitât a son i masegns: indi ten cinc o sîs devant dai pîts e ju tiri un daûr chel altri. Sta sigure che un al cjape il bersai. E cussì, masegn dopo masegn, o vin jemplât il paîs di pieris. Daûr di me cumò nol é plui chel mûr che o vevi fat sù par nô doi, al jere l’inizi de nestre cjase, de nestre vite adun, ma al jere impuartant alenâmi e no vevi altris claps di tirâ infûr di chei dal mûr.
Lûs de mê vite, ti promet che chel mûr al tornarà sù cun ancje chei altris trê, o fasarai il tet e o metarai in sest il dentri par me, te e i fîs che o varìn. Timp che a finissi cheste stupide vuere.

Lûs de mê vite, ti buti il gno cûr di là di grums e confins.

To, Khaleel

di Alessandro Valoppi (Real Cocâl)
#1275