CorseCurteMai#16 – Bundì

#15 – Bundì

O soi sierât in cjamare cence il coraç di vignî fûr. No voi plui in bagn – masse pericolôs!, o fâs ce che ai di fâ tune tirine: la mê compagne di assedi. Par mangjâ, o mangji il mancul pussibil. Cuant che propit no ja la fâs plui o voi in cusine, ma planc, felpât tant che un gjat. Mi alci dal jet controlant ducj i moviments par no fâ rumôr, o sbassi a planc a planc la mantie de puarte vueleant cul pinsîr la sieridure. O cjamini in ponte di pîts spostant il pês gram par gram dai dêts al talon, cui muscui de gjambe fats di gome. O rivi in cusine e o vierç il frigo, e chê e je forsit la part piês parcè che la lûs de puartele e je une spie infalibile de mê presince. In curt o varai bevût l’ultin got di lat e finît l’ultin toc di pan, e varai di frontâ i fornei, cul lôr cisicament traditôr. Mi tocjarà cuei la robe… o no mangjâ.

Dut al è cambiât di joibe. Rivant cjase di vore, tal jentrâ, o ai vût un sintiment gnûf e incuietant. La clâf e faseve resistence tal zirâ. Un sgrisul mi è svuiçât dal cûl al cuel e i miei pêi si son dreçâts. Sta trancuil, mi soi dit, tu varâs zirât mâl, nol è nuie di ce e nol è il câs di vê pôre. Cui voi discocolâts – cualchidun o cualchi alc mi stavie ostacolant tal jentrâ a cjase mê? – o ai provât di gnûf a zirâ la clâf. O ai fat fature, ma ae fin e je zirade.
Ma une volte jentrât, lis robis a son ladis dome piês. O sintivi, e lu sintivi a clâr, che no jeri bessôl ma no viodevi nissun. Nol veve di jessi nissun! Cuntune vosute rote o ai dit “Bundì”. Ce stupit che tu sês, mi soi dit, a cjase nol è nissun, cui varessial di jessi? Ma cualchidun invezit mi à rispuindût. “Bundì!”. No ai plui capît nuie, il gno cûr al pompave fin a sbusâmi il pet, soi corût in cjamare e mi soi sierât dentri.
Lis robis a van indevant cussì di trê dîs. O mangji dome robis piçulis che no fasin rumôr. O fâs lis bisugnis tune terine. No duâr plui, al massim o piert cognossince.
Vuê matine, tornant de cusine, cu la code dal voli o ai viodût une code lungje e pelose che e sparive in bagn. Ce robe jerie? E parcè fevelavie par furlan?

di Margarite Cogôi (Volketitrei-Liga)
#1274

2 comments