CorseCurteJugn#03 – Ce aio di fâ?

#03 – Ce aio di fâ?

“Ce aio di fâ?” Al domandà il fantat confondût. L‘om al veve dute la pazience dal mont, lu veve fat tantis voltis che al veve za pierdût il cont.
“Tu âs di puartâ ai clients ce che a vuelin, dulà e cuant che lôr a scugnin di vêlu.”
“Tant che un puestin?”
“No!”
“Aio di puartâur il sushi?” L‘om al alçà il cjâf par no fâ viodi il fastidi tai voi. Cheste no le veve mai sintude. Masse telefonins, cheste gjenerazion no lei plui. Tornant a cjalâlu te muse, cun tenarece al tacà a sclarî l‘impegn.
“Al è diferent, parcè che tu tu puartis la pize daspò che e ven domandade. Noaltris o rivìn prin che i clients a capissin di vê la necessitât. Tu âs di convinci la int a cjapâ la tô robe, a àn di jessi pleâts des tôs peraulis.”
“Alore o scuen vendi bibliis tes cjasis?”
“No, orpo boie!” Lis peraulis a vignirin fûr cuntun sbruf di salive. Verementri chest fantat al podarès secjâ un sant. Al tornà a fevelâ tant che une mestre di asîl.
“Il presit al dovarès di jessi clâr pai clients. A tornaran chel che a àn cjapât, dome cuant che ur vignarà domandât. Juste la stesse cuantitât. No sin usurârs, lôr a son intun altri repart.”
“Chest no lu ai capît” al disè il fantat. Vonde zirâ lis peraulis, ur tocjave di rivâ tal vues.
“O puartìn timp. Timp par chei che a son restâts cence. Ai students che no rivin a studiâ dut pal esam di doman. L’artesan che nol rive a finî l’incarghe plui impuartante de sô vite, za paiât e di consegnâ pal vinars. Il compositôr che al scuen scrivi la musiche dal ultin filmât pal regjist cun chel caratarat pal prossim mês e la pôre no lu lasse nancje scomençâ. Il scritôr che al à di partecipâ a chel preseât concors e no i ven nuie tal cjâf.”
“E cui che a son in pericul di murî?”
“Par lôr al rive dome l’esatôr. Il paron si gjave il timp prestât cuant che un al è dongje dal finâl.”
Il fantat al somee stazâ la propueste a lunc.
Finalmentri, dineant cul cjâf al dîs: “Mi displâs, ma no ai timp…”
“Par te frut, ti pues ufrî un bon di scont dal Black Friday che al scomence propit cumò!”

di Noemi Salva (Passarute)
#1285