CorseCurteMai#07 – Cjapât dal nemì

#07 – Cjapât dal nemì

Tant che a vevin planificât il viaç al jere tacât di gnot. Il flum al jere calm, si scugnive no fâ masse rumôr stant che e jere une scjampade. A vevin sielzût di cjapâ une barcje piçule, tant che un sbordon, par movisi in mût scuindût cence crevâ la aghe. Fasint leve tal fondâl dome cul jutori di une piertie a rivarin inte isole daspò di une ore di navigazion, a jerin in trê, fruts, amîs de vite che a scjampavin dal mont, stracs dal ream dai adults, soredut des lôr regulis. Cumò no saressin plui normis a arzinâ il lôr spirt.
L´aiar di libertât e la adrenaline de vicende ur puartave a lâ dome indevant. A completâ la suaze i spagnolets che a vevin freât ai lôr gjenitôrs ur dave un grues contribût ae sensazion di grandece impulsive e di autosuficience.
La prime deliberazion ur indreçà a fâ une gjite ator de isule par cjatâ une posizion, tant che corsârs a cirivin un puest strategjic e sigûr dulà protezi lis provisions in câs di atac.
Intant di chê altre bande i lôr gjenitôrs a jerin disperâts. Cence olmis nancje segnâi di vite intun marimoment dut il borc si metè a cirîju. Si organizarin grups di int par ristielâ dut il paîs cence vê buine fortune. Daspò di un timp ducj a jerin avilîts e lancurôs pe vicende e a vevin pierdût lis sperancis.
Stant che inte isule lis gnovis no rivavin i fruts no pativin nissun caric emozionâl in confront dai lôr parincj, a jerin decidûts a no molâ, a vevin clâr che chê ribelion e veve date di inizi ma no di scjadince.
Intal borc al jere za passât cuasi un an de sparizion e si jerin organizâts i funerâi par dâ une sierade ae vicende. Propit chel dì inte gleseute il plevan al jere a dî cualchi peraule cuant che al è stât fermât di une vosade di femine…
“Vigji ven jù de cjase dal morâr che il gustâ al è pront, mole chel libri par un moment che tu no tu ses Tom Sawyer.“ Par Vigji chê cjasute e jere la sô isule intal mont dai adults, un mont comandât par lui, dulà che i mancjave un pocje di autosuficience.

di Lenart Gjavedon (Scalembrut)
#1265

Scolte la conte dal vîf:

1 comment