CorseCurteMai#02 – Tornâ a cjase

02 – Tornâ a cjase

La lûs e jentrave dai bûs de persiane rote balant cul polvar dilunc di une musiche che a sintivin dome lôr. Il soreli crevadiç de Sierade al slargjave i rais come dêts luncs che a cjareçavin lis cjadreis e la taule tal tinel, parsore des monts di gjornâi e robis vieris che a taponavin il barcon.
Tal mûr che al jere te ombrene, une puarte e menave te cusine frede e cuiete. Nancje lis fantasimis di odôrs dai pascj de famee si nasavin tal aiar fer. I fornei a polsavin da agns, lis pignatis vueidis e cidinis si insumiavin cun lontans tocjs de domenie. Tal curtîl, il grant cjaldîr di ram al spietave di jessi messedât par une polente che no sarès rivade mai plui.
Ogni dì al vierzeve i voi e al cjalave cence viodi cheste scusse vueide dulà che al vignive a durmî, ma no a vivi. A pene il timp di metisi bregons e scarpons par lâ vie a cirî alc pe bocje. Simpri fûr, cul cûr indurît di dolôr e solitudin.
Chei pôcs che i volevin ben a jerin in pinsîr par chê vite avilide. A cirivin di convincilu di vignî a mangjâ par Nadâl e di no restâ di bessôl pai compleans. Ma nuie lu gjavave fûr dal troi che si veve fat sù agns indaûr cence nancje inacuarzisi.
Une sere lu veve clamât un vieri amì de famee par puartâlu intun lûc dulà che si sarès cjatât ben. Par gjavâsi fûr di chê telefonade scomude al veve prometût che al sarès vignût, pûr che nol veve nancje un fregul di interès.
Il tren lu veve puartât dongje propit a chê ore e cence pensâ masse si veve cjatât te puarte che une femine i vierzeve cuntun mandi sonôr. Chei suns cuasi pierdûts a vevin impiât alc dentri di lui. Alçant il cjâf al veve cjalât ben la femine tai voi. Daurman, lu veve menât parsore, intune stanzie cuntun fogolâr e dôs taulis plenis di int. Chel cliput che al jere jentrât pes orelis cjapant puest tal cûr scûr al jere cumò un vint cjalt e fogôs. Lis peraulis par furlan a corevin da un mûr a chel altri, a balavin ator dal fogolâr cun mil vôs, chês presints, chês passadis e chês dal avignî.
Sveât pe prime volte da agns, finalmentri al jere tornât a cjase.

di Noemi Salva (Passarute)
#1260

1 comment