CorseCurte#12 – Al larà dut ben

#12 – Al larà dut ben

Rome, ai 19 di Mai dal 2022             

     Mari mê amade,
infin, jo e i miei fradis, o sin rivâts in Italie. Cjase nestre e je stade par un mês un camion cragnôs plen di animâi che a puçavin di smusar e di sacs di cjanaipe cul cafè in fermentazion. Un viaç framieç di bestiis slapagnadis che a scuintiavin pardut  intune umiditât di scjafoiâsi. O vin preât il signôr di rivâ… ma no si rivave mai!
     Di chel infier alì, dopo jessi passâts sot pes racladis di chei maladets cuintribandîrs di oms in Libie, al è tacât un altri viaç, pues stâi ancjemò piês dal prin. Sfracaiâts ta un gomon malsacodât cu la canicule de Istât dal mediterani, oms, feminis e fruts come cjans rabiôs che si mangjavin i pedoi un cun chel altri tal mieç di un mâr di aghe… ma cence aghe!

     Mame mê amade,
cumò, jentrant ca dentri, ta chê che o podìn clamâ cjase dopo tantis faturis, si sintìn rinvignî e cjapâ fuarce. Une fuarce che o vevin cuasi pierdude pal troi, une fuarce che nancje nô no pensavin plui di vê.
     O vin cjatade une cjase biele, nete e sane! Nuie a ce viodi cun chês dal nestri slum di Kinshasa. Chês cjasis sporcjis, brutis e sudadis. Chê ca no. Chê ca e sarà il premi che ducj nô o vin bramât par une vite interie passade te miserie e te fam nere. Chê ca e sarà une cjase moderne, une cjase plene di int, un lâ e tornâ di culturis, di mangjativis di dutis lis cualitâts, un grum di fiestis, di conferencis, di concierts, di vite gnove. Un biel movisi, un cognossi int par fâ l’amôr e cjatâ gnûfs amîs. Une cjase blancje come il savon, cu la piel tenare di frute e i cjavei di forment. Une cjase in salût, magre, che e fâs palestre e e mangje san. Une cjase che mi fasarà vignî la voie di meti sù famee, di vê fruts, di lavorâ, di viazâ e fâ progjets pal avignî.

     Une cjase biele di murî, di fiere alte, di çavariaments maraveôs, di vissiis che a tuchin maduris prontis par sclopâ, di bufulis plenis di materie, di pice e puce mefitiche e di un davoi di pus frait.  Tu viodarâs mame, AL LARÀ DUT BEN!

La tô frute          
Vuarvuele de Simiis     

di Rudy Citòs (Borussia Dordul)
#1270

1 comment