CorseCurteMai#04 – Berta di Rivis

#04 – Berta di Rivis

A Rivis e jere chê di Nene e Dree. E chê di Nadâl e Mariane. E daspò chê di Nardìn e Lisute, chê di Milio e Bete e chê di Berta, che e jere bessole.
Dôs stanziis di pît su par cuasi ducj. Li di Nene e Dree un plan sôl, lunc e stret, cul coridôr là che si vierzevin lis cjamaris, il tinel e la cusine. Une cjase dissegnade dal perît Gjerumiute. Nadâl e Mariane, invezit, a vevin ancje une braide, grandonone e dividude in tocuts di ort. Une cunvierie par verdure e dapît il sorc.
Nardìn e Lisute a vevin volude une vilute. Cuant che jerin tornâts de Svuizare a vevin comprât un toc inte braide dal cugnât di jê e timp doi agns a vevin fat il licôf, a pene prin che al nassès Tonino. Doi plans plens di teracis e barcons e dentri frêt d’Invier e cjalt d’Istât, che i sieraments no tignivin ben.
Milio e Bete si jerin contentâts. A cjase dai soi di lui a vevin tirât sù ancjemò dôs stanziutis e zontade une cjamare par volte cuant che i fruts e jerin rivâts.
Berta no veve nissun a spartî chê cjasone cul tet di cops e i trâfs di len a viste. Cu la gorne di ram e piere devant e daûr par fâ plui biel e pedrâts di piere serene. Une tende blancje a coreve dilunc dal barcon dal tinel, suntun grant puiûl che si podeve mangjâ. Une taule di fier e cuatri cjadreis cuviertis di cussins a rosis e une plante di lavande che e saltave fûr di un vâs di cuet. Un spetacul… Si sentave suntune cjadree e intant e cjalave la strade. Mai nissun ch’al passàs di chês bandis, mai nissun ch’al passàs a cjatâle. Une vile tant che un palaç e nissun par gjoldile. Berta e jere simpri stade malmostose, fin di frute. Ti cjalave di stuart, ti mostrave la lenghe, ti soflave se tu i disevis alc. Pecjât, e sarès stade une biele zovine. Alte e bionde, cun cjaveli ricjot e voli maron. Ma no plaseve a dinissun. Ae fin no veve mai cjatât un morôs o une morose e ancje se e veve la cjase plui sflandorose di Rivis… Berta e restave sul puiulut a cjalâ chê vite che i jere scjampade come aghe jenfri i dêts.

di Silva Ganzitti (Copasse Blu)
#1262

2 comments