Come sûrs

Nina in chȇ matine no rivave a jevȃsi  e si messedave tal jet come se une fuarce le blocàs, ma e jere dome la sȏ agjitazion che no le lassave di cuant che e veve cjapȃt chȇ letare che e veve subit platȃde in fonts dal cassetin dal armaron de cjamare e no veve vȗt ancjemò il coragjo di leile.
Cussì cjapade di chei pinsȋrs e veve sierȃt la puarte cu la clȃf e si veve decidȗt a lei chȇ letare:

Cjare Nina, o miȏr mame,
no varès mai pensȃt di clamȃti cussì, parcè che par me tu sȇs stade simpri mȇ sȗr e cumò a disevot agns o ai scuviert la veretȃt leint cheste letare che ti mandi che ti à scrit tȏ mari prin di murȋ  e che mi veve preȃt di leile ancje jo dopo la sȏ muart. Jo le ai vaiude tant come une mari speciȃl , e je lade lassant la sȏ olme cui siei odȏrs, colȏrs e savȏrs e i siei voi simpri lusints e lis sȏs peraulis che mi mancjin tant.

Nina e veve let chel preambul e cu lis mans che i tremavin e il cȗr che i bateve fuart tal pet e veve scomençȃt a lei la letare di sȏ mari:

Nina mȇ,
a son passȃts disevot agns di cuant che Lena e je jentrade te nestre vite e te nestre famee, o vevi cirȗt tantis voltis di scriviti ma lu rimandavi simpri fin cuant che no ai vȗt plui timp. Ogni dì ti ai pensȃt e o volevi fevelȃti di jȇ par che tu le cognossesis miȏr e no jessi cussì impreparade a ricevile cuant che jo no fos stade plui ca. Tai prins timps o jeri ancje inrabiade cun te che tu jeris partide cussì e tu le vevis bandonade parcè che tu disevis di no jessi pronte a fȃ la mari
e di fat a sedis agns tu jeris pȏc plui che frute. Jo no sai se soi stade brave a stȃi vicin spietant che tu tornassis. Cuant che le viodevi malcontente mi cruziavi pensant che forsit e veve sintȗt chel distac e jo no rivavi a colmȃ chel vueit.
Jo o crȏt che no si puès confrontȃ la maternitȃt biologjiche cun chȇ afetive, a son diferentis ma une vore bielis e fuartis dutis dȏs. Jȇ tai prins mȇs, cuant che e scomençave a dȋ lis primis peraulis, mi clamave continuamentri “ mame” e jo le ai lassade continuȃ a fȃlu simpri. E veve bisugne di dȋlu come dal aiar che e respirave. Cun jȇ mi soi sintude mari ancjemò di plui pe responsabilitȃt di dovȇ cressile al puest to.Ma l’amȏr al fȃs miracui, cumò che e je aromai une fantate o soi contente di ce che e je deventade, une zovine tant di sest, biele dentri e fȗr, legre, sincire e inteligjente. O crȏt che di miȏr no podeve jessi e i auguri di vȇ dut il ben che e merite. Cumò che o dȇf lȃ vie che e je rivade la mȇ ore, al è rivȃt il moment che tu cjapis il puest che ti spiete, nol sarà dut facil di prin, ma o soi sigure che Lena e rivarà a cognossi la sȏ vere mari e a vȇ il puest che i spiete tal sȏ cȗr.

Nina e veve sierȃt i voi intant che lis lagrimis i corevin jù pe muse e i pareve che jȇ e fos li vicin che le confuartàs e in chel moment i mancjave tant.
E jere une frute di sedis agns cuant che e veve cognossȗt Nando.
Une relazion che purtrop un destin tragjic e veve soncjȃt tal nassi cuant che Nando al jere restât vitime di un incident sul lavôr, una muart assurde e incomprensibil par Nina. Nando i veve fat il don di une vite come olme di chel prin amȏr cussì zovin, ma Nina no jere pronte a frontȃ dut chest, il dolȏr al jere stȃt masse fuart di superȃ  e no i pareve juste chȇ nassite rivade cuant che Nando le veve za lassade par simpri.
La frutine  e veve pȏcs mȇs cuant che Nina le veve bandonade. E veve lassȃt un biliet a sȏ mari là che i diseve che e doveve partȋ, che no si sintive pronte a fȃ la mari, no si veve fat viodi par agns, e veve cuasi volȗt dismenteȃ il so passȃt, si veve costruît une gnove vite lontan dal paȋs di montagne là che e jere nassude e cressude.
Nina e spietave cul cȗr in man di viodile, cumò che si veve liberȃt di chel pȇs che e veve su la cussience, i pareve di rinassi.
Ameti finalmentri la veretȃt al jere stȃt un grant sfuarç ancje se la prove dal cambiament e doveve jessi dome cul vivi te veretȃt e Nina e saveve che cumò e doveve frontȃ dut chest cun onestȃt  e coragjo di front di ducj e di front dal mont.
No bastave duncje dimostrȃ di amȃ veramentri chȇ fie che e veve platȃt par tant timp, ma e doveve ancje jessi acetade di ducj te sô gnove famee. Nina e saveve che dome l’amȏr familiȃr al rive a superȃ ducj i ostacui  e lis dificoltȃts e al è il plui condurant ancje se nol è simpri manifestȃt  ma al è impuartant che al sedi costant e vȇr.

di Egle Taverna
#1258

2 comments