Une vite in spiete

Di so nono, che in cjase a disevin ducj che al jere bocon, biel e plen di sgrimie, al veve cjapât dome il non – Fausto – ma stant chel al someave simpri sclagn e patît, nancje che al ves metût i vistîts parsore dai vues, lu cognossevin ducj par Faustin. Il non intîr lu veve sintût a doprâ dome intai agns di scuele, ma al coventave juste juste parcè che i bulats lu coionassin come Fausto l’Infausto. Timps che par fortune a jerin passâts, ancje se la sô vite no jere mai cambiade.
Saldo sierât in cjase, vistût di neri, simpri cidin, palit, cu la pinie che i platave la muse, al veve un zero taront e sigûr in dutis lis ocorencis relazionâls de esistence: amîs, murosis, divertiments, passetimps, ridadis…
Un hikikomori, cualchidun al diseve, scjassant il cjâf.
Par chel sô mari, forsit la uniche che no si jere inmò rindude a dâi une vite sociâl a chel fi solitari, no veve dite nuie cuant che lu veve viodût a jessi di cjase pôc prime di scûr. «Mi cjati cuntun amì», al veve dite.
Cuatri peraulis. Cuatri peraulis e la vôs incricade de emozion. Un event!
E par Faust al jere pardabon un event. Un event che al spietave di une vite, o almancul, di cuant che al veve capît ce che pardabon i interessave a lui, de vite. Al veve studiât la lenghe, misteriose e aromai vive dome intai libris. Al veve imparât a memorie lis scrituris, par fâ colp. Al veve preparât un omaç, sierât intune scjatule di carton. Al veve in sachete lis cjandelis, par preparâ la atmosfere e un zes zâl par disegnâ sul concolât une stele che ju tignìs dentri ducj i doi, cuant che si saressin braçolâts intune union di animis. E si ben che no i fos mai interessât nuie dal zodiac al jere di agns che al studiave i planets, par rivâ a cjatâ la date perfete, l’incrosâsi di costelazions e lune e univiers che a segnassin la miôr congjunzion pussibile.
Une vite in spiete, e cumò e jere vignude la ore.
Al veve vût conferme. Si saressin cjatâts. Di chê gnot, la sô vite e sarès cambiade par simpri. La sô anime si sarès elevade di un scjalin.
Nol viodeve la ore di podê ufrî la totâl devozion, e cjapâ indaûr ce che i spietave. Ma invezit, tal scûr, cence nancje une sesule di lune, tal mieç dal cimitieri dal paîs e dal ciulâ des civiutis, al veve dome spietât.
E spietât. E spietât.
Spietât la miezegnot, la ore des striis.
Spietât lis trê, la ore dal lôf.
E spietât il prin clâr, sfantâsi sul marmul des tombis.
Dibant.
Al veve scugnût rindisi: lui nol sarès vignût.
Vaint, disperât e cu lis mans sporcjis di sanc di gjaline, Faust al veve spudât intal pentacul e al jere scjampât fûr dal cimitieri cence nancje cjalâ dulà che al meteve i pîts. Ma nol rivarà nancje a straviersâ la strade.
Un Ducato neri targât BE 723 BU nol rive a frenâ in timp e lu cjape in plen. Anzit… nol frene propit. L’autist, tart al so apontament, al leve di presse e al vuidave cui çucui.

di Rafaêl Serafin
#1229

4 comments