CorseCurteMarç21 – Spieli

#21 – Spieli

Jê e veve une personalitât une vore introvertide, il confrontâsi cun i altris al jere stât simpri un afâr di rive sù, salacor parcè che si sintive une vore osservade pe sô peculiaritât fisiche te muse che e veve sin de nassite.

Une volte e dome par câs, e cjatà la forme di rivâ a vê une vite plui simile a chê che a vevin i siei coetanis. A piçule etât, une serade e veve di lâ a un incuintri cui i siei compagns di scuele e come di solit si veve refudade fin al ultin moment, pûr chê volte, no si sa parcè e veve decidût di lâ.
Prin di partî, cuant che si faseve i cjavei inte sô cjamare di front al spieli par platâ chê peculiaritât che e veve te muse e tacà a pinsirâ al incuintri. E strolegave ogni moment e e rivave a viodi ogni piçul detai, tant che se e fos li, sunôrs, odôrs, un grum di percezions che no veve mai vût. E jere une vore sugjestionade dal contest che e veve creât tal so cjâf, une vore fuart, tant reâl, tant reâl che dibot si cjatà intal puest. Si inacuarzè propit di vê passât cualchi frontiere e che e veve propit fat un salt. Chê prime volte no rivà a comprendi dal dut la situazion e par prionte e sperimentà une gnove sensazion, i siei sintiments a jerin libars di cualchi pês, si sintive a planc, e inmò la sô muse no veve nissune imperfezion. Salacor i doi fats a vevin une relazion.

La matine dopo e podè confermâ i fats incirche ae gnot prime tant che e veve la cjamese plene di taculis e piçui tocs di cjarte tai cjavei propit di chel incuintri, però al stes timp e podè confermà che i siei compagns no le vevin mai viodude.

Chê prime volte si rindè cont che e veve un argagn jenfri lis mans, che e veve cjatât un mût di liberâsi di un pês che al condizionave la sô vite sociâl. Al je cussì che ogni volte che e veve voie di vê un svagament e tacave la cerimonie di front al spieli, il puartâl di dulà che e jere vignude cuant che e nassè e il stes che i veve provocât la cicatrîs te muse che e identificave chei che a vignivin da chel marimont.

di Lenart Gjavedon (Scalembrut)
#1225