CorseCurteMarç#19 – Claps – rivocs tal sanc

#19 – Claps – rivoc tal sanc

“…il sanc ch‘al bat il timp, tal timpli
la sô corse il cori dal to tremâ…”
tocut de poesie “Caìn”
di Pier Luigi Capello

E jere une fieste grande tant che une volte, prime di cheste pandemie. La musiche e faseve rontonâ il cûr. La lûs e compagnave chel rontonâ cuntun riclam tarlupant.
Al somearès che ducj chei che a son daûr di chest rituâl tant che chel aquileiês, a sintin plui o mancul i batits. Si sint tal cûr e ancje tai timplis. Poi tu tu sâs che chel sens tai timplis nol è dome la musiche. Al à alc che al rontone dal to dentri, e che al ven plui dentri. Dal pet. Dal cûr.
Cuant che ogni Vierte al capite la ricorrince (graciis a Diu) dal trê di Avrîl, ogni cjase, ogni edifici, o chel arbul cuntun pecot, ducj che a rafigurin un animâl. Chê chimere che il Patriarcje al à sielzût par un popul che al insumii (e o crôt di sintî la vôs dal professôr Floramo), un popul che al pense intun futûr inovatîf.
O sin chei che o sintìn la corse, il cori dal to tremâ dal sanc tal timpli, – e achì e je la vôs di Pierluigi che al lei la sô poesie, peraulis di bielece par Caìn e Abêl. Ma cheste piçule part, tant che al pues jessi di une bielece za di bessole, mi met a pensâ sul rivoc.
Ise chê corse dal sanc, chel bat insiemi di ducj i cûrs furlans ator pal mont?
Cori par scrivi, un tocut par mês, al podarès jessi tant che chel bati dal cûr furlan. Il bati al unison dai furlans ator pal mont, in ogni clap dongje dai cjavedâi dai Fogolârs. Ducj chei che si metin adun daûr di chê chimere che e somee une acuile, o grifon, o cemût si clamie?
E in chel moment o varìn une storie, un passât e une tradizion. E al scomençarès ancje un gnûf futûr pe lenghe furlane.

“…che al vignarà une dì di vê une storie, un passât, une tradizion!
Intant, furlans cjapait tant che vêr une lenghe tant che altris…”
Pier Pauli Pasolini

di Eduart Baschera (Acuari Cence Branchis)
#1223