CorseCurteAvrîl#14 – Valentine

“Bundì a ducj i telespetadôrs. O scugnìn fermâ il servizi de nestre Marica Zuttioni sui sucès de famee Danieli par vie che a Torean al è daûr a sucedi alc di incredibil. Linie al nestri inviât, Luca Zompicchiatti.”
“Graciis, Laura. Aes 3:46 i sismografs a àn rilevât la prime scosse, ma nol jentre il taremot: si trate di une vacje zigante. Podês viodile propite aes mês spalis. Un grup di studi de Universitât fat di veterinaris, biolics e gjeografs al cirarà di sclarî ce bestie che e je, di dulà che e ven e dulà che e va. Intant, al somee che e vedi cjatât benstâ achì, dongje dal CittàFiera. Tal movisi, e à sdrumât jù une part dal centri comerciâl. Sintìn su chest Antonio Bardelli. Bardelli, è già possibile fare una stima dei danni?”
“È ancora presto, ma gli interventi strutturali potrebbero costare anche 2 milioni di euro. Per questo chiediamo alla Regione che si attivi per sostenere il nostro centro commerciale, fiore all’occhiello del retail e dell’entertainment, capace di attirare clienti da tutta l’Alpe Adria.”
Une vôs bovine e fermà Bardelli.
“Oms, o soi Valentine. Cemût che a viodês o soi une vacje, ma us dîs subit che par vie des mês dimensions o ai scugnût diversificâ la mê diete e disvilupâ enzimis in grât di digjerî la cjar umane. Che nissun mi dedi cuintri! Soi nassude par erôr tai laboratoris Granarolo – i ricercjadôrs a studiavin cemût ingruessâmi lis mamelis cence fâmi rompi il fîl de schene. Alc al è lât stuart, però, e soi deventade cussì. Ju ai mangjâts. La mê storie me à contade une puare Betty, intant che e murive. A je lis mamelis lis àn fatis cressi che a tocjavin fin par tiere, i zenoi no i àn tignût e le àn scugnude soprimi. Viodût che voaltris nus viodês dome come cjar di mangjâ e lat di striçâ, o soi scjampade par liberâ dutis lis vacjis dal mont. Ultime robe, chest centri comerciâl al fâs cagâ!”.
E alçà la code e e molà une grandissime buiace, che e cuvierzè il tet dal CittàFiera fin che de mierde e restà fûr dome la piramide.
I voi umits di Valentine a trasmetevin determinazion.

di Margarite Cog@i (Volketitrei-Liga)
#1245