CorseCurteAvrîl#13 – Cencegjambe

#13 – Cencegjambe

E jere une volte un vecjo cjan salvadi, une vore brut, spelât e strissinît.
Talmentri magri che si viodevin fin lis cuestis.
Lu clamavin Cencegjambe, parcè che al veve pierdût la gjambe daûr.
Al jere savint, cun dut ce che al veve passât.
Fin di picinin, al jere un spirt libar e cjaviestri, plen di vite.
Une dì, al jere scjampât fur de cjase de siore Clotilde e, in chel moment, une machine lu veve cjapât sot e al veve rote la gjambe.
Cjariât sore la camionete, lu àn puartat intun cjanîl e, li, ducj chei altris cjans lu clamavin “Cencegjambe” e i davin dutis lis colpis.
Cussì, botis e sorebotis, tantis, par dut e dome e simpri a lui.
Une dì, par un vuast eletric, lis puartis si jerin viertis e ducj i cjans a jerin scjampâts. Ducj a corevin; dome Cencegjambe al jere restât indaûr.
A cressi la sô avilizion i pensavin i umans, che lu cjalavin di brut e lu sburtavin vie e a ridevin cuant che al çuetave. Ma Cencegjambe si rabiave: “Bau, bau, us fâs ben viodi, jo, cui che al è Cencegjambe” al pensave.
Velu, daspò, ator pa la citât, a insegnâ ai zovins cjans bandonâts come vivi miôr, ancje cence une cjase e un paron. A lui i bastave par jessi content.
Ma, dopo cualche an, al invidiave i cjans zovins, parcè che lis personis a volevin vêju e puartâju a cjase. Lui, invezit, al jere vecjo, strac e brutut.
Une dì, cjaminant cuntun piçul bastardut cu la musute a maglutis blancjis e neris, al viodè vignî dongje une biele frute, bionde e cun doi voi plens di tenerece. Cencegjambe si metè in bande, in mût che e podès cjarinâ il cjâf dal cjanut. Invezit, la frute e cjalave e cjarinave dome lui. Sììì, propit lui, che nol rivave a crodi a ce che al stave sucedint. Dôs lagrimis i colarin jù dai voi e la frute lu cjapà in braç e i disè: «Di vuê in poi, tu, tu sarâs simpri content».
Lu puartà a cjase sô, indulà che so pari al jere il famôs “Mago dai carelins”, chel che al à inventât i carelins pai cjans disabii. E Cencegjambe al jere disabil e, finalmentri, volût ben.

di Pierina Gallina (Gialine Padovane)
#1244

1 comment