CorseCurteAvrîl#10 – Cindy

#10 – Cindy

Cindy e je la mê gjatute: un comun tui european blanc, grîs e neri, cuntune maglute su la musute che le fâs ancjemò plui biele. A pene nassude e je stade cjatade intun cassonet des scovacis, cui siei trê fradis. Ju àn dispatussâts ducj cul biberon e dopo ju àn dâts in adozion.
Par me e je stade la prime esperience, il tignî un gjat in cjase, ma no mi soi mai pintût, ancje se di dams mi ‘nd à fats, e ancje tancj. Cumò jê e à nûf agns e e je il gno amôr.
Stant che o stoi in condomini e il gno cuartîr al è al prin plan, no pues lassâle libare di cori fûr e alore e à di contentâsi de mê terace. Ogni tant mi cjati in cjase cualchi lisierte, moscjons e une volte parfin un passarut. Naturalmentri jê si spiete che i disi: – Brave! cuntune cjarece. Purtrop o soi stât costret a spadâle, par no fâle mateâ tant e jo no vê masse fastidis.
Cu la int foreste e je un pôc difidente e no si lasse cjapâ in braç, però in compens di sere, cuant che jo mi distiri sul divan a cjalâ la television, jê e salte sù e mi ven vicin vicin; mi cjale fis, mi fâs un dolç “miao” e dopo si slungje sui miei braçs fin su lis spalis e mi met la musute fin cuasi a sfiorâmi il nâs; si sisteme ben cu lis çatutis e a la fin i ven fûr chel inconfondibil “ron ron” che al vûl dî bonstâ, ricognossince, amôr.
E al è propit in chei moments che i perdoni dut, che mi sint ancje jo in pâs cul mont intîr e alore no pues fâ di mancul di cjareçâle, di dîi peraulutis dolcis, di tirâi lis mostacjutis e lis orelis, di gratâle par ben sul cjavut e sot dal gargat.
Bon, in mancjance di altri, si scugne ancje contentâsi dal afiet di un gjat, no mo?
Ogni matine jê e sta simpri atente che mi tiri fû dal jet a buinore, ancje par vê la sô razion di crocantins, e cuant che o ai di lâ fûr, jo le saludi simpri e jê mi rispuint. Magari cussì no ma dutis lis gnots, tor lis cinc, jê mi salte sul jet e cuntune fuarte sgnaolade mi vise che e je rivade la ore di cocolâle, e alore o scugni rassegnâmi, parcè che no son sants.
Plui tart, cuant che o soi daûr a fâ di gulizion, jê si place su la taule par jessi petenade cul scovet e subite dopo gustât mi spiete intal tinel par zuiâ. Alore o tiri fûr la bachetute di plastiche cu la surîs, o pûr i fâs i dispiets cu lis mans, però o cor ancje il riscjo di jessi sgrifât, parcè che si sa che i gjats a son une vore svelts cu lis çatis!

Une sere che o jerin sul divan, forsit che magari i vevi fat une gratadute di masse, o forsit parcè che e veve la zornade stuarte, si che duncje mi à muardût la man. Jo, che propit no mi le spietavi, o ai reagjît di bot cuntune pache su la muse e i ai vosât di brut. Naturalmentri e je scjampade vie.

Dopo un pôc o voi tal bagn, e jê mi ven daûr. Si plante propit di front di me, mi fisse a lunc intai voi e tire fûr un “miaaaaooo” lunc lunc che nol finive plui, come par dîmi: – Scusimi tant, o ai sbaliât, perdonimi, fasìn la pâs…
Par dîle dute o soi restât cence peraulis e mi à vignût un grop in gole, e alore no ai podût fâ di mancul di cjapâmile sù e di bussâle fuart fuart… Dopo mi soi ancje dit di bessôl: – Ma cjale tu i nemâi: in ciertis situazions a àn ancje plui sintiment e bon sens di noaltris personis…
Jo par altri o resti simpri striât de sô elegance cuant che si môf o tai moments che si nete cun scrupul, lecântsi par dut o mentri che cu lis çatutis e “fâs la paste”, o biel che e cîr di cjapâ al volo lis moscjis o pûr cuant che mi vise che la sô scudiele e je restade vueide.
A voltis jê e reste ferme li a cjalâmi par cussì tant timp che mi sint cuasi intrigât e alore i domandi: – Ce ise, amôr? E se no rivi a capî ce che jê e vuel dîmi, mi sint parfin in colpe… Ma il gno cûr mi si sglonfe a plen dutis lis voltis che jo i dîs a plancut cuntune bussadute: – Ti vuei ben, sâstu. -, e jê alore e strenç i voi intune maniere cussì dolce che o capìs subit che la robe e je reciproche.
Po ben, cumò jo e la mê gjatute o saludìn ducj parcè che e je vignude la ore di lâ a durmî.
– Però doman che e je domenie, Cindy, par plasê, lassimi durmî un ninin di plui, dai…

di Renzo Turùs (Il Fi di Marie dal Cafè)
#1241

1 comment