Risultivis

De strade principâl che e puarte a Rivignan al partive di traviers un viâl dret e blanc, compagnât ai flancs di arbui grancj, che al menave a un lûc di aghis risultivis. Insom dal viâl si vierzeve un curtîl che al spaziave par dai puest a cui che al vignive a mulin.
Il mulinâr al jere un amì e intant che il nono al faseve cuatri cjacaris, il piçul Checo si pierdeve a cjalâ ducj chei mecanisims che insiemi a corevin par trasformâ i grignei in farine.
Pal frut il mulin al jere un puest magjic, fat di ingranaçs e ruedis cui dincj, oms blancs di farine come fantasimis, figuris che si trasformavin in siums di ogni sorte, che ogni tant lu sveavin di colp.
Checo al vignive ancje tirât di lâ dal mûr, dulà che la aghe e sbrissave di rive jù, par patafâ lis palis e movi bruntulant lis grandis ruedis di len.
Plui in dentri, lunc il cors di aghe che al puarte al mulin, si rive dulà che la aghe si sbasse, cussì il piçul si faseve judâ a gjavâ scarpis e cjalçuts par jentrâ. Al restave a bocje vierte pal fresc e delicât passaç dal licuit che al sintive su lis gjambis, dal cori lent e continui de aghe, dai riflès che la lûs e mostrave, ma ancje dal podê bagnâsi a volontât cence pôre di sedi cridât.
Par ordin che Checo al cresseve, so nono lu invidave a cirî particolârs: cjalâ la limpiece de aghe risultive, cjalâ i mulinei nassi e murî, nasâ l’odôr delicât dal muscli e chel intens de mentuce, da origjin insumis a une relazion sentimentâl cul element aghe e cul lûc, par mostrâ al frut la sapience che e regole la vite.
Po dopo si tignivin par man, cjaminant lunc di un troi che al puartave dulà che la aghe e faseve un salt e alore si sentavin dongje par scoltâle a svuacarâ. E ogni volte il nono al domandave a Checo ce che la aghe i veve sugjerît. “Sa tu stâs atent tu sintis la aghe cjacarâ”,  lu invidave a scoltâ. Il svuacarâ al stimolave la fantasie di Checo, ma par lui nol risultave un colegament cul lengaç che al veve imparât, cussì al rispuindeve al nono inventant sul moment. Il vecjo alore al riduçave e al rispuindeve che i sens bisugne coltivâju par mendâ lis relazions, e che lui al veve imparât a fermâsi, fa domandis, cence premure di rivâ a une conclusion.
Ancje di zovin student dal Conservatori, cuant che al podeve, Checo al coreve là, al meteve i pîts tal aghe, lassant il cuarp a riposâ e contentâ la anime. Po dopo al cjapave il troj e si fermave par sintî la aghe svuacarâ,  tirâ fûr notis di violins, flauts, arpis, un lengaç musicâl che al podeve sedi voltât ancje in peraulis. Ogni volte, pôc prime di tornâ cjase, si sintive obligât a pandi graziis pal ben ricevût.
Al Conservatori al veve studiât tant, solfegjât e ripetût spartîts impegnatîfs fin avonde. Il sfuarç e l’impegn lu vevin fat deventâ un brâf musicist, “Tu âs un mût di sunâ origjinâl” ai disevin i coleghis.
Checo al veve cjapât un impegn di sperimentâ une relazion personâl e segrete cul so strument, par da vite a un lengaç musicâl fat di notis limpis che e feveledin come la aghe di risultive.

di Gaetan Cogôi
#1203

1 comment