Lets in Osterie: Il furlan “queneau” ti stufe

Il furlan “queneau” ti stufe
Carlo Tolazzi
Kappa vu, 2022
CE LIBRI ISAL?
Un libri di un centenâr di pagjinis che al è a mieze strade jenfri il saç su la lenghe (o miôr, lis lenghis), la leterature e il teatri. Al à dentri 6 cjapitui, une jentrade e une sierade, e ben furnît di citazions e riferiments bibliografics.

MA CE ISAL DENTRI, DI PRECÎS?
Soredut zûcs fats doprant la lenghe. I sîs cjapitui a tratin dal pangram, dal monovocalism, de lipogramatiche, dai palindroms, di leturis fonichis e dal macaronic. Ma dentri, cjapant la scuse dal lipogram, si cjate ancje une piçule racuelte di contis curtis, che l’autôrs si è divertût a scrivi.

MA CUI ISE L’AUTôR?
Carlo Tolazzi al à centantis voris fatis che al è une vore dificil che no lu vedis incrosât intun cualchi spetacul di teatri di chei che al à scrit o in cualchi libri par furlan. Al à vinçût plui di une volte concors cun scrits par il teatri e il Premi San Simon.

A CUI I PUEDIAL PLASÊ?
A ducj chei che ur plâs zuiâ cu lis peraulis, che a sedin i zûcs de setemane enigmistiche o i divertiments fats par imparâ une lenghe. A cui che al à voie di cjapâ la sfide lançade di Carli e cirî di fâ miôr di lui inte produzion furlane. A cui che ur plasìn i saçs che no si cjapin masse pardabon e a si lein cun gust. A cui che ur plasìn lis contis curtis.

E SE O AI VOIE DI CJOILU?
Facil. In rêt, o sul sît de Kappa vu.

1 comment