CorseCurteMarç#11 – Etât dificile

11 – Etât dificile

Lis dodis cjandelis a iluminarin la musute di Stiefin cui smursiei sglonfs. “Domande un desideri” a diserin in côr lis vôs ator de taule.
Cun lis cjandelutis ancjemò fumantis, Stiefin al domandà di no lassâ nissun cence cerçâ la torte: lui al veve judât a fâle, si spietave che i plasès a ducj e che chel al jere un dai siei desideris parcè che di grant al voleve fâ il scaletîr.
– Ahhhhh a suspirarin ducj dolcementri.
Stiefin, braurôs, al cjapà sù di puartâ porzions a ducj i grancj. Cuant che la torte e finì ju cjalà cuntun riduç di orele a orele.
Daspò al cjapà une guantiere plene di cjocolatins e al le fûr tal curtilut di zûcs par spartî a siei compagns. Ogni tant al fevelave a vôs basse a Carli, il fradi grant dal so miôr amì, masse adolessent par zuiâ cun fruts, masse piçul par sintîsi comut cun adults.
Za al è timp – i disè Carli daspò di mieze ore.
Stiefin al corè a platâsi parsot di une taule intun cjanton dal salon. Da chel scuindarili al viodè come che si formave a colp une rie di grancj devant da la puarte dal bagn.
“Za a viodaran come mi compensi di no vê fât la fieste che o volevi e di no vê vût il regâl che o vevi domandâ”.
“Il mût che mame si è pleade al so morôs in chel di no spindi tant e il pai ae sô morose cun chel che o soi masse piçul par il celulâr che o vevi domandât? Za a viodaran”.
Si divertì cjalant intes musis cemût si faseve ogni volte plui complicât di scuindi la urgjence. Cuant che cualchidun al tacà a instreçâ lis gjambis e a pleâsi par sopuartâ e contignî il pussibil disastri al metè a fûc il celulâr e al taçâ a filmâ. Il climax dal video al fo in doi câs che a no poderin evitâ l’inevitabil. E un premi extra par lui: si tratave da lis cubiis di mame e pai.
Intant che il videut al deventave virâl, Stiefin si svicinà a Carli, che al jere stranementri cuiet, forsit un pôc spaurît. I tornà il celulâr.
– Il prometût, o ti ai segnât la liste di preferencis di mê cusine e i lûcs dulà che e va.
Si sintive la scjarie dal cabôt funzionâ di fis.

di Zorz Cesaratto (Vecjo Claes)
#1215