CorseCurteMarç#10 – Fâ la fieste

#10 – Fâ la fieste

Vuê dutis lis scusis a son buinis par fâ fieste: si è inventade chê dal pai, de mame, des feminis, dai inamorâts, dal lavôr, de Patrie… e vie dilunc.
Nuie di mâl intindintsi, ma ancjemò un pôc no varin plui dîs di vore.
Une volte si faseve fieste dome la domenie; i contadins nancje simpri, parcè che cun vacjis e meniche no si resone.
Pai fruts invezit, e jere fieste grande in ducj i sens (orelis, nâs, voi, bocje e piel) cuant che si copave il purcit: in chê dì si saltave dutrine e ancje scuele.
I sunôrs dal purcitâ si sintivin adore te arie: il sclopetâ dal fûc sot il cjalderon de aghe, il dâsi di vôs di feminis e oms, il vuicâ de bestie tal cjôt, il colp sec che la copave, il gratâ dai curtìs su la crodie une volte metude su la bree, il dâ jù de manarie sui vues, il ciulâ de machine di masanâ.
Tal mentri che l’odôr dai budiei sot sâl, prin di passâ te aghe bulinte e deventâ elastics par po jemplâsi di cicin, ti stiçave il nâs, pal curtîl e pe stanziis al buligave il dolcit dal sanc e dal gras, il picantin dal pevar e de nole moscjade pal masanât e l’agri dal ai che si misturave cun chel dai flâts e dal sudôr.
E sul misdì, de cusine si spandeve un profum di brusadule cuete su lis boris che al meteve la aghegole ancje a un muart.
Il frêt dal Invier là di fûr al grampave cun çatis di glaç la piel, il nâs ruan, lis mans crudulidis, i pîts indurîts tai stivai di gome, ma nissun di nô fruts si rindeve.
Ancje viodi passâ da vite a muart la bestie e la trasformazion dal sô scarsanali a costituivin une prove di superâ par no jessi coionâts cunins.
Dut câs la gjonde plui grande i spietave ae bocje: fricis e luianie te fersorie, brusadule e salam tal asêt a jerin gjoldiment sclet.
Finide la opare, si dave une man a sistemâ i imprescj che a vignivin lavâts, onts e metûts intune cassele di len, pronts par altris purcitadis, e subit e jere ore di cene.
Po, stracs muarts, vie tal jet: dome il timp di pensâ “ce vitis a fâi la fieste al purcit” che za ti plombave il sun.

di  Rosute Pelote
#1214

2 coments On CorseCurteMarç#10 – Fâ la fieste

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît