CorseCurteMarç#08 – La mê domenie tal cafè

#08 – La mê domenie tal cafè

Une volte, se tu jeris il fi di cui che al veve un cafè di mandâ indevant, tu jeris obleât a judâ i tiei e di sigûr tu vevis pôc timp di lâ fûr a zuiâ cui amîs.
La mê domenie e scomençave aes siet a buinore cul bagn inta podine di len, che e fumave cuant che tu jentravis, e la piel ti deventave rosse di tant cjalt; e cuant che tu vignivis fûr e jere deventade grise di tante cragne che tu i vevis lassât dentri.
Di matine tu si inacuarzevis che e jere fieste par vie che la int e veve metût sù i vistîts bogns e e jere ancje biele nete, massime intai cjavei. Lis feminis si metevin il sbelet e lis cjalcis gnovis e un vistidut plui di sest, biel che a fasevin la cjaminade par lâ a messe. Dopo di solit a vignivin tal cafè a bevisi il capucin e magari a ordenavin ancje la paste creme o il crafen. Mi visi ben che mê mari si jevave aes cuatri di matine par preparâ il gjelato, che in chê volte al jere di pocjis cualitâts: creme, cjocolate, mandolât, pistacchio, nosele, limon e freule. A cui che lu consumave dentri, come cumò si lu meteve tas coputis di veri, magari cu la pane montade e la amarene parsore, e il dut si clamave “nafta”.
Pai oms no podeve mancjâ il classic taiut di blanc, metût te tace cul butilion, e par cui che al voleve un spritz, o tiravi fûr la pesante butilie di veri blu lavorât, cu la manilie di alumini, par scliçâi dentri la aghe minerâl gasade.
A noaltris fruts nus plaseve tant di bevi la gasose e ancjemò di plui la spume, dolce e colorade come la mîl, e al jere un plasê a parâle jù, cussì biele frescje e sauride.
Jo no mi visi di vê passât une fieste a gustâ e a cene mangjant ducj insiemi inta taule de cusine dal bar, parcè che almancul un di noaltris al scugnive stâ daûr dal banc a sarvî i clients, e alore si davisi il cambio.
Tal dopodimisdì la int e vignive in cafè prime di lâ al cine, o pûr ancje dopo, e se al jere Invier i clients a ordenavin une vore di cjocolate cjalde, di vin brulè e di punch, al rum o al naranç, che ti scjaldavin ben i bugjei e lis vuarelis.
E cuant che e vignive une cierte ore si viodeve che la int no jere plui cussì legre, al pinsîr che tal doman ur tocjave tornâ a vore, e noaltris fruts a scuele.
A la fin de zornade tal cafè al restave ancjemò cualchi cjoc a berlâ e cjantâ, e alore mê mari lu parave fûr cu la scove.
Cussì e finive ogni fieste tal cafè di mê mari Marie.

di Il Fi di Marie dal Cafè
#1212

2 coments On CorseCurteMarç#08 – La mê domenie tal cafè

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît